Shillong, Nohprah 07: Ki bor jong ka District Administration jong ka East Khasi Hills mynta ka jan miet kila rah ia ki dkhot jong ka seng Hynniewtrep Youth Council (HYC) sha Mawngap ha dien ba kim treh ban sngap ia ka ei kaba la bethah ia ki ba kin pynkut noh ia ka jingshah thngan jong ki ha ka por saw baje jan miet.
Katkum ka jingiathuh jong u Bah Rober June Kharjahrin la ong ba na ka liang jong ka seng kala pan jingbit na ki bor pyniaid ia ka District Administration ba kin pynlong ia kane ka jingiakhih ban shah thngan na ka bynta lai sngi, hynrei ki bor sorkar kila ai tang haduh saw baje mynta ka sngi bad la shai ka sngi ruh kim shym la ai jingbit.
Na ka liang jong ka seng HYC kila rai ba kin betewng beit ia kane ka jingiakhih shah thngan jong ki ha katei ka jaka ha jan additional secretariat kumba kila rai. Ka seng mynta ka sngi kala sdang ia ka jingialang ha khmat jong u mot jong u Bah Bull Lyngdoh president ka KSU ba mynshuwa bad u myntri ba rim jong ka sorkar ha Malki bad nangtei ki sa wan iaid paidbah sha ka jaka ba kila buh ban pynlong ia ka jingshah thngan ha additional secretariat.
Ha dien ba la kut ka por kumba la ai jingbit saw baje hynrei na ka liang jong ki dkhot jong ka seng HYC ki dang beteng ia ka jingshah thngan ha katei ka jaka. Halor kane ka jingbym sngap jong ki dkhot ka HYC na ka liang jong u Superintendent jong ki pulit u la bethah ban rah noh ia ki katei ka jaka sha Mawngap Police station.
Kane ka jingiakhih jong ka HYC ban pynlong da kane ka jingshah thngan kaba lai sngi ka long ban dawa na ka sorkar ia ki ain kiba khlain ban iada na ka jingwan tuid jong ki briew kiba nabar sha ka jylla. Na ka liang jong ka HYC ka kynnoh ba kane ka sorkar kaba la ialam da ka seng Congress kam shym la lah ban leh ei ei ha kane ka bynta.
