Shillong, Lber 15: U Myntri Rangbah ka jylla u Conrad K Sangma u la ong ba ka jingialang jong ka kabinet kaba la long mynta ka sngi kala ia kren halor ki ar tylli ki byta kiba kongsan, kawei ka long halor ka rule jong ka kyndoh kaba 21 jong ka MMDR Act, ha kaba ia dei bad ka jingpynkit bad jaka buh ia u dewiong ba la tih beain hap ban shna ia ki rule da ka sorkar jylla.
Kane ka dei katkum ka jingshem jong ka iing bishar jong ka NGT dei halor kane ka sorkar jylla kala shna ia ka rule ia kaba la pdiang ha ka jingialang ka kabinet bad kane ka rule la tip kum ka “Meghalaya Minerals Prevention of Illegal Mining Transportation Rule 2022”.
Kine ki rule kin trei na ka bynta ki marpoh khyndew kiba heh bad kiba rit bad kane kan peit kyrpang eh na ka bynta kito ki jingkit beain bad jingbuh ia ki marpoh khyndew kiba la kit beain bad ban pynbeit ia ka jingai ia ki shallan ban kit ia ki marpoh khyndew katkum ka bor bala pynkut ha ka kyndon kaba 23 (c) jong ka Mines bad Minerals Regulation Act, 1957.
Kawei pat ka rai kaba ka kabinet ka long ban ithuh noh kum ki nongtrei sorkar ia kito kiba trei ha ki kam balait ha ki tnad sorkar hynrei kiba la shah thung pat kum ki nongtrei ba shipor.
Kumba la iatip ba ka Supreme Court kala pynmih ia ka rai ba khlem da pass ia ki eksamin na ka MPSC lane DSC, ne kiba khlem bud ia ki kyndon thung kam khlem da but ia ka bhah kam bun na ki la ithuh kum ki nongtrei sorkar hynrei ki don khyndiat eh pat ki khlem ioh ban ithuh kum ki nongtrei sorkar.
Halor katei ka rai jong ka supreme court kito kiba dang lait kila mudui sha iing bishar da ki 3635 ngut ki nongtrei, ka kabinet kala shim ia ka rai ban ithuh noh ia ki kum ki nongtrei sorkar ba pura kala sdang bad kane ka long naduh ka sngi ba la pynmih ia ka jingpynbna sorkar bad kine ki hap hapoh ki kyndon kiba ka sorkar kala buh.
Kine ki nongtrei ki dei kiba la trei bad ka sorkar naduh ki snem 1996 bad 1997 ki don ruh kiba la trei na duh u snem 1995, hynrei ka snem kaba la buh dei u snem 2007 bad ki ban ithuh noh kum ki nongtrei sorkar kan long haduh u snem 2007.
Kane kam dei ia baroh kiba trei shipor lane kiba trei sngi bad ka sorkar, kane ka long tang ia kito kiba trei ha ki kam bala don hapoh ka tnad sorkar kiba la ioh ia ka tulop kumba ioh lem kiwei ki nongtrei sorkar hynrei ym pat ithuh ia ki kum ki nongtrei sorkar.
Kane kan nym ktah ia ka pla pisa jong ka sorkar jylla namar ba kila dep ioh lypa ia ka tulop katkum ka tulop sorkar, kaba long mynta ka long ban shu ithuh noh ia ki kum ki nongtrei sorkar
