New Delhi, Nohprah 20: Ka jingïadei jong ka India bad ka thain Gulf ka la mad ïa ka jingkylla kaba khraw ha kine ki shiphew snem ba la dep, kaba don ïa ka dak kaba shai jong ka jingïadei shimet jong u Myntri Rangbahduh Narendra Modi.
Kaei kaba ka New Delhi ka la ioh ha ka thain West Asia naduh u snem 2014 ka long kaba ym pat ju jia ha ka histori jong ka jingiadei jong ka India bad ka Gulf. Ka jingiatreilang ka la nang kiew na ka jingshaniah ba mynshuwa ha ki hydrocarbon bad ki nongtrei jong ka ri India, da kaba pynkylla ia ka sha ka jingiadei kaba kham thikna, kaba la pynskhem bad kaba don jingshaniah ha ka sain pyrthei.
Ka jingleit jngoh jong u Myntri Rangbahduh Modi 15 sien ia ki ri jong ka GCC (Gulf Cooperation Council), kaba long kaba bun tam da uno uno u myntri rangbahduh ka ri India, ka la wanrah ïa ka jingïajan kaba ki sorkar kiba mynshuwa kim shym la lah satia ban wanrah. Ka GCC hi, kaba kynthup ia hynriew tylli ki ri Arab, ka dang long kawei na ki kynhun ba kongsan tam ha ka thain, kaba pynwan dur ia ka jinglong jingman jong ka ioh ka kot bad ka sain pyrthei jong ka West Asia.
Ka dak jong kane ka jingshaniah kaba thymmai ka la wan lyngba ki jingpynkup burom ba halor duh na ka bynta ki riew paidbah jong ka thain. San na ki hynriew tylli ki ri thain Gulf, ki la ai khusnam ba halor duh mynta ia u Myntri Rangbahduh Modi, ha kaba ka Oman, ka la rung ha katei ka thup, ha ka taiew ba la dep, haba ka la ai ia ka khusnam Order of Oman.
Kane ka wan hadien ba ka UAE ka la ai ia ka Order of Zayed ha u snem 2019, ka King Abdulaziz Sash jong ka Saudi Arabia ha u snem 2016, ka khusnam King Hamad Order of the Renaissance (First Class) jong ka Bahrain ha u snem 2019 bad ka Order of Mubarak Al-Kabeer jong ka Kuwait ha u snem 2024.
Ym tang ki jingpyndep rukom Kaba kongsan ka long ba kine ki jingpynkup burom kim dei ki jingpyndep rukom. Ha ka thain ha kaba kum kine ki jingpynkup burom la buh kyrpang na ka bynta kito ki nongialam kiba long kiba lah ban shaniah, kiba kongsan ha ka liang ka buit treikam, ki jingpynkup burom ki pyni ia ka jingshaniah kaba jylliew kaba kyrpang bha.
U Myntri Rangbahduh Modi u dei u nongïalam ba nyngkong eh ha ka pyrthei ban ïoh ïa ki khusnam ba ha khlieh duh na ki san tylli ki ri ka thain GCC, ka khubor saiñ hima sima ka bym dei tang ka jingpyndep rukom hynrei kaba pyni ia ka jingshaniah ka tnain Gulf ia ka jinglong nongialam jong u bad ka jingkiew ka kyrdan jong ka India.
Kane ka long kaba kongsan khamtam haba kheiñ ïa ki jingkhmih lynti kiba la don shwa u snem 2014. Bun ki riew shemphang ki ngeit ba ka West Asia ka lah ban long ka jaka kaba eh na ka bynta u Myntri Rangbahduh Modi, da kaba kdew ïa ki jingïashun hapoh ka thaiñ bad ki jingeh jong ka saiñ hima sima jong ka.
Hynrei, u la tei ïa ki jingïahap jingmut jong u ha kylleng ki nongbah jong ka thain Gulf, da kaba wanrah ia ka jingjop ha ka liang ka jingïadei kaba kiwei kiwei ki myntri rangbahduh jong ka ri India kim shym la lah ban pynurlong ha ki por ba la dep.
Bun kiba ong ba ka jingïadei jong u bad u President ka UAE, u Sheikh Mohammed bin Zayed Al Nahyan, ka long kaba sngewtynnad bad kaba don tynrai ha ka jingshaniah mar kylliang. Ka jingïakren jong u bad u Syiem Saudi Salman bin Abdulaziz ka la plie lad ia ka jingiasoh lang ha ki buit treikam.
U syiem jong ka Bahrain, Hamad bin Isa Al Khalifa, U Amir Sheikh Meshal Al- Ahmad Al-Jaber Al-Sabah jong ka Kuwait, u Sultan Haitham bin Tariq jong ka Oman bad u Emir Sheikh Tamim bin Hamad Al Thani jong ka Qatar ki la jubab da ka jinglong kaba plie lad bad ka rukom kaba kham niar ban ioh ki nongialam na kiwei kiwei ki ri.
Ka jingjop ba kyrpang jong u Myntri Rangbahduh Modi Ha kylleng ka Gulf, ka jingseisoh ka long kaba shai: U Myntri Rangbahduh Modi u la ioh ia ka jingjop kaba phylla. Ki khusnam ba heh tam na ka bynta ki riew paidbah ki pynskhem ia ki jingkylla kiba la paw lypa ha ka jinglong jingman jong ka thain.
Ka jingsngew ba ka India ka dei ka paralok kaba skhem, kaba lah ban shaniah bad kaba donkam eh ka dang kiew ha ka thain Gulf, khamtam haba ka thaiñ ka wad ïa ki lad thymmai ha ka ïoh ka kot, ka jingïatylli ha ki kam digital, ka jingïatreilang ha ka bor ding ba lah ban pynthymmai bad ka jingïahap ha ka kam saiñ hima sima.
Kane kam dei ka kam kaba tang shipor jong ka jingiadei hynrei ka jingpynbeit thymmai ia ka jinglong jingman. Ka jingpeit jong ka thain Gulf sha ka thain mihngi mynta ka shem ia ka India ym ha ki jaka khap pud hynrei ha pdeng jong ka jingpyrkhat kaba jrong jong ka. Hapoh u Modi, ka India ka la kiew na ka jinglong paralok ha ka jingïadei sha ka jinglong ka bor saindur ïa ka lawei ba kongsan jong ka thaiñ, ka jingkylla kaba ym pat ju jia shisha mynno mynno ruh ha ka jingïadei jong ka India bad ka West Asia.
