Shillong, Jylliew 02: Mynta ka sngi ka High Power Committee (HPC) bad ka Supervision Monitoring Committee (SMC) kila ia kynduh ha ka sien kaba lai ban pynkhreh ia ka 39th National Games 2027 kaban long ha Meghalaya.
Ia ka jingialang la pynlong hapoh ka jingpeit jong u Dr. Vijay Kumar D, IAS, Commissioner bad Secretary jong ka Tnad Sports bad Youth Affairs, ka sorkar Meghalaya, ryngkat bad ka Supervision and Monitoring Committee, kaba la khlieh da u Bah Diki D. Shira, MCS, Director Sports.
Ha kane ka komiti ka jingialang kaba la long bad iwei pa iwei baroh 8 tylli ki State Sports Associations lyngba ki jingïakren shimet (one-on-one consultation), kiba la shah khot ban wan ki la ai ia la ki jingpynsngew halor ki jingpynkhreh jong ki.
Ki jingïakren ki la kynthup ïa, Ka jingdonkam briew , Ka jaka trei jingmut bad jinghikai , Ki tiar ia lehkai Ka jingpynbiang ia bam ba biang ia ki nongkilan met , Ki tournaments ba la thmu , Ka jingpynlong ia ki selection trials lyngba ha ryngkat ki jingpyntip ki jingpyndonkam ia ki kor stad kiba shai, Bad ka jingangnud ban ïoh takma ha ki jingïalehkai
Kham mynshwa kane kine ki kommittee ki la dep pynlong ka jingialang ar sien ha ka 21 tarik bad ka 29 tarik u Jymmang 2025 bad haduh 18 tylli ki State Sports Associations. Ki la dep ban ia syllok bad kine ki ar tylli ki Committee.
Kat haduh mynta ka sngi, 26 tylli ki associations kum ki, Archery, Arm Wrestling, Athletics, Aquatics (Swimming), Canoeing & Kayaking, Badminton, Basketball, Boxing, Cycling, Football, Gymnastics, Judo, Karate-Do, Kho-Kho, Lawn Bowls, Muay Thai, Rowing, Shooting, Table-Tennis, Taekwondo, Tennis, Volleyball, Weightlifting, Wrestling, Wushu bad Yogasana ki la ïadon bynta ha kine ki jingiasyllok ki jingïakren shimet kawei pa kawei ka State Association.
Ki jingïalang jingiasyllok bad kiwei pat kiba dang sah yn dang bteng ha kine ki sngi ban wan. Kitei ki ar committee ki la pynsngew ruh shaphang ka jingdonkam ban don ki jingpynkhreh kiba bniah ban da khmih bniah ia ki rukom pynkhreh da kaba la buh ha ki nongrim kiba shai ban ioh ban jied ia ki nongialehkai kiba tbit shisha khamtam ha ka selection bad ki trails kum shi bynta ban ioh ka jingpynkhreh kaba bniah kaba janai ban kyrshan ia ki State Sports Associations na ka bynta ka jingpynkhlain ia ka kynhun jong ka jylla kaban mih sha ka National Games 2025.
Nalor u Chairman u Dr Vijay Kumar D, IAS, Commissioner, ki heh sorkar bad na ka liang ka MSOA kiba la ïadon bynta ha kane ka jingïalang ki kynthup: R. Yangthan, IAS, Joint Secretary, Sports, Shri Diki Shira, MCS, Director of Sports, Shri John F. Kharshiing, Working President, MSOA, Shri. Matsiewdor War Nongbri, Vice President, MSOA, Shri Finely L. Pariat, General Secretary, MSOA, Shri. Ksan Warjri, Treasurer, MSOA, Shri P.B. War Nongbri, Assistant Director, Sports, Shri K. Passah, Assistant Director, Sports, Shri Phranki Pale, Senior Engineer, State Sports Council of Meghalaya, Bad kiwei ki ophisar bad ki technical staff
Ki seng kiba la ïadon bynta ki la ai ruh ïa ka jingbatai kaba bniah halor ka sports strategy bad ka jingdonkam ne requirement jong ki, kaba la pynbeit ban phah sha ka sorkar bad ki bor ba dei peit na ka bynta ka jingshim khia bad ka jingpynlong kaba biang ha la ka por.
Kane ka jingïaid shaphrang jong ki jingïalang bishar ka pyni shai ïa ka jingkular jong ka Sorkar Jylla ban ai ka jingïarap kaba khlaiñ, kaba da ka rukom trei kaba ka jylla ka khmih ban pymioh ban tei ia ki jaka ialehkai bad lehse ban pynmih burom, khamtam ha ka jingpynshai ïa ki samla.
Ha ki rukom jingpynkhreh technique bad ka jingpynbiang ïa ki jingdonkam kum ka infrastructure ban pynkhreh pura ïa ka Meghalaya ban pynlong ïa ka 39th National Games ha u snem 2027 kiba lah ban tei ia ka burom jong ka jylla ha ki snem ban wan ruh kane ka jingpynkhreh kan nym kut tang ha kaba iadei bad ka 2027 hynrei kan long ka jingbet ia u symbai ban sei ia ki rang kynsai ha ki snem ban wan.
