Shillong, Jymmang 25: Ka Dorbar shnong Mawpait Tlongpleng mynta ka Sngi hapoh ka jingialam u Myntri jong ka shnong Bah Donboklang Kharlyngdoh ka la leit ban ia kynduh ia u Executive Engineer (EE) ka PWD Road, Mawsynram Division, Bah TS Basan.
Ka jingleit kynduh jong ka Dorbar shnong ia utei u Executive Engineer ha ryngkat ki mat jingdawa na bynta ka surok hapoh katei ka shnong, ka long hadien ka jingshah ieh bein, shah ieh khunswet ha la ki nongmihkhmat (MLA & MDC) kumjuh ruh ha katei ka tnad (PWD) la kumba 25 snem duna ei ei.
Ka surok Balat na lad Mawpen shathie sharum la dep ban shna ha kine ki 2 bad 3 snem da ka tnad PWD Road, tangba ka surok hapoh ka shnong jong ngi, ym don ba peit, ym don ba iohi.
Ki la don ki bynta, jong ka surok hapoh ka shnong, khamtam mynta por lyiur, ki la kylla kum ki pung dohkha, la ong u Bah Kromlin Shylla uwei na ki nongaiktien ka Executive Dorbar. U la kren bynniaw shuh shuh, ba baroh ki ju ia ong ba u surok udei u budlum ka ioh ka kot, tangba ha Shnong jong ki kam Shem la long kumta.
U Secretary jong ka shnong Bah Marius Nongsiej haba ai jingkren u la pynpaw ka jingaikhublei ia u Executive Engineer (EE), ba hadien ka jingiatai bad pynsngew ia kitei ki jingeh na ka Dorbar.
U Executive Engineer, u la sngap bad shahshkor da kaba u la kular ba un sa shimkhia noh mynta u snem na ka ophis ban pynbeit ia kitei ki jingeh ba shnong ka la mad mynta da ki phew tylli ki snem. Kane ka long katkum ka kyrwoh ba la pyllait da u Bah M.Nongsiej Secretary Dorbar shnong Mawpait Tlongpleng.
