Shillong, Nailur 17: U Lamphang ka kynhun ki seng bhalang hapoh ka shatri jong ka Confederation of Meghalaya Social Organization (CoMSO) u bah Robertjune Kharjahrin ha ka jingialang ha Motphran ban pynshai paidbah halor ka jingdawa ban pyntrei kam ia ka Inner Line Permit (ILP) hapoh ka jylla u la ong, “Sorkar jer kyeteng katba phi mon, tang ba ka ain ka dei ban iada ia ka jaidbynriew”.
Ha kane ka jingialang paidbah, une u nongialam u la ong u la tyrwa sha ki khynmen, khlem da jer kyrteng mano kita ki khynmen u la ong “Ialam maphi na khmat ngin but mangi na dieh, tang ba ka lynti ka dei ban long sha ILP”.
Ha kane ka jingialang u la tyrwa ruh ba na ka liang jong kane ka kynhun CoMSO ka kloi ban ia shong ban ia kren ia sngewthuh jingmut lada ka long mynta ka sngi, la shai ka sngi ne ha kano kano ka por na ka bynta ban dawa na ka sorkar ban pyntreikam noh ia ka ILP ha kane ka jylla.
La pynshai paidbah ruh ba na ka liang jong ka CoMSO kala pynjem ia lade, ha kaba ia dei bad ka kyrteng jong ka ain, kam shym ong shuh ILP, hynrei kala ong pynbha ia ka Meghalaya Residence Safety and Security, Act kaba la shna ha u snem 2016 da kaba pynrung ia ki lai tylli ki kyndon hapoh jong ka MRSS Act.
Ki lai tylli ki kyndon ka long ba u ne ka briew ba wan na shabar ka jylla ki dei ban da ioh jingbit, ia kiba rung khlem jingbit dei ban kem bad ban pynshitom katkum ka ain, bad kawei ka long ban pynkylla ia ka Meghalaya Land Tranfer Act ha kaba ki bar jylla kim lah ban thied jaka.
U Bah Robert u la ong ba lada ka sorkar kala lah ban pynrung ia kitei ki ar tylli ki kyndon bad wanrah ia ka jingpynkylla ha ka Meghalaya Land transfer Act, ka jingmut jong ka ILP kala don hangta, lada kine ki la rung ha ka ka ain kaba ka sorkar kan sa shna, kampher la ka sorkar ka jer kyrteng, Conrad ne Mukul ruh kampher.
Kiwei kiba la kren ha kane ka jingpynshai paidbah ha kaba ia dei bad ka jingdawa ia ka jingdawa ia ka ILP ki long , u Bah Lawyerson War president ka JSU, u D Sun presidentka WKSU, u bah B Ryntathiang president ka CORP, bah D Marwein General secretary jong ka WYF, Bah Hamar Lyngkhoh jong ka HANM, bah Sambormi Lyngdoh president ka EJNU, u Samla Treibor R Suchen president JSU Shillong City, Doboklang Kharlyngdoh na ka HYC u Chairman jong ka AGJAC u Nikman Marak.
Ha kane ka jingialang ki paidbah kiba la wan ban ia sngap ia kane ka jingpynshai halor ka nongrim ba kine ki seng bhalang ki dawa ban pyntrei kam ia ka ILP hakane ka jylla ki long na kylleng ka Ri Khasi Jiantia. Ha ka juh ka porn a ka liang jong ki pulit ruh kila pynlong ia ka jingpahara kaba biang ban peit ba kan nym don ka jingthud ia ka shong suk shnongsain.
