Shillong, Jylliew 22: U bah PN Syiem Chief Executive Member (CEM) jong ka Khasi Hills District Autonomous Council (KHADC) ula ong ba u Chairman jong ka iing dorbar ula pyniaid ia ka ing dorbar katkum ka AD Rule. Ka jingkynnoh na ka liang iatei ba u Chairman ula leh donbor ka dei tang ka jingkren ban da rapjot ia ka jingrhah bor ka jong ki.
Ka kong Telinia Thankhiew mynta ka sngi ka la wanrah ia ka motion bym don jingshaniah shuh ia ka Executive Committee. Na ka liang jong u Chairman ula pynbna hapoh ka iing dorbar bad ula panbor ruh na ka iing dorbar ban pdiang ne kyntiat bad ka iing dorbar kila pdiang ha kaba la pynbna ba ia kane ka motion un shim hadien ba la kut ka por jingkylli.
Ki liang pyrshah mynta ka sngi haba la poi ka pali ban ia tynjuh bor, ka kong Thankhiew kala ka la iaid ruh sha khmat ban pule ha kaba iadei bad ka motion bym don jingshaniah shuh ia ka EC, hynrei ka la wohdong ba kam shym ioh ia ka jingthoh, kala ong ba katkum ka rule dei ban shim hapoh 24 kynta lane ar sngi hynrei kim shim peit pat ia kawei ka kyndon kaba ong lada donkam kyrkieh u Chairman u lah ban shim noh ia ka motion wat shwa ka 24 kynta.
Ka jingdonkam kyrkieh kaba hap ban shim noh ia kane ka motion byn don jingshaniah ia ka EC ka long ba ka liang iatei ka ong ba kumno ka EC ka bym don shuh ia ka jingbun paid kan passed ia ka mang tyngka dei na kane ka daw ban pynthikna la ka EC ka don ne em ia ka jingpynpait la hap ban shim noh ia ka motion bym don jingshaniah shuh khnang ban ia shai.
Hynrei ki liang iatei ki tip shai kdar ba kim don ia ka jingbun paid ki sa ia mih noh napoh iing dorbar da kane ka jingleh jong ki ka kren shai kdar ba ka UDP, HSPDP bad ka Congress ki long kawei. Kaei kaei kaba la jia ha iing dorbar ka long katkum ki kyndon kiba la buh ha ka Assam and Meghalaya Autonomous District ( Constitution of District Council ) Rules , 1951.
