Shillong, Kyllalyngkot 19: Ki nonghikai skul SSA jong ka jylla Meghalaya kila phah ia ka jingujor sha u Myntri ka sorkar pdeng ba deipeit ia ki kam pule puthi ha kane ka Ri India u Prakash Javadekar ha kaba ia dei bad ka jingsiew tulop jong ka sorkar ia ki nonghikai SSA ha kane ka jylla.
Kum ki nonghikai SSA, kila sngewlyngoh ban iohi ia ka hukum jong ka sorkar jylla kaba la pynmih ha ka 31th Risaw 2016 kaba ong b aka sorkar jylla kala pyniapher ia ka rukom siew ia ka tulop da kaba buh ia kine ki kyndon, ki nonghikai ki dei ban long kiba la pass ia ka XII bad ki dei ban ioh 45% ki marak bad ki dei ban pyndep ia ka jingshah hikai kum ha ka DI.EL.ED/ B.ED katkum ki kyndon jong ka NCTE.
Ki nonghikai kiba la pynbiang ia kitei ki jingdon kam ka sorkar kala pynkiew ia ka tulop na ka T.9,200 tyngka ha ki LP School sha ka T.19,044 tyngka bad ia ki UP School pat na ka T.9,900 tyngka sha ka T.20,493 tyngka.
Katba ia ki nonghikai kiba khlem pat pyndep ia kito ki kyndon kiba la buh da ka sorkar ka jingsiew ia ka tulop jong ki la pynkiew na ka T.9,200 tyngka sha ka T. 13,335 tyngka kane ka long ha ki LP School, katba ha ki UP School ka sorkar kala pynkiew na ka T.9,900 tyngka sha ka T.14,392 tyngka.
Ha kaba ia dei bad kane ka jingleh jong ka sorkar jylla ki nonghikai SSA ki kwah ka jingpynshai na ka sorkar pdeng ba kala don ka jingshah khate na ki nonghikai SSA ha ki LP school haduh T.57,09 tyngka bad ha ki UP School kala don ka jingshah khate haduh T.6101 tyngka.
Ha kane ka dorkhas kaba la ai sha u myntri ka sorkar pdeng ki nonghikai SSA kila kdew shai ba katkum ka PAB kaba la dep kam shym don kata ka jingbuh kyndon bad ka jingsiew ka long kum juh ia baroh, naduh u snem 2001-2005 kaba ki dang ioh T.1500 haduh T.3000 tyngka, ha u snem 2010-2013 ka jingioh ka long T.3000 haduh T.6000 tyngka bad naduh u snem 2013, ki ioh T.6000 tyngka bad mynta ha ki LP school ki ioh T.9,200 tyngka bad ha ki UP School lo ioh T.9,900 tyngka.
Ka jingkylli kaba ki nonghikai SSA ki kwah ban tip ka long ba balei kane ka sorkar jylla ka buh ia kane ka jingpyniapher ha kane ka PAB-2016-2017, kaei kaba ki tip ka long ba kam don kano kano ka jingpyniapher.
Na ka liang jong ka seng ka kyrpad ia u myntri jong ka sorkar pdeng ba un tuklar lem ia kane ka kam jong ki nonghikai SSA bad lad aka long ban pynsangeh ia katei ka hukum jong ka sorkar jylla, ka seng kan jinda la pdiang sngewbha lada ia ka tulop jong ki nonghikai SSA la siew katkum ka jingtrei slem ka jong ki.
U Bah L Marngar president jong ka seng AMSSASA u la ong ba kin ap ia ka jubab na u myntri ka sorkar pdeng ha kaba ia dei bad kane ka kam, kan long kumno lada kam don kano kano ka jubab bad kin sa ia shong biang bad ki lah ban leit sha iing bihsar ban pan ia ka jingpynshai.
