Shillong, Lber 30: Ki khatlai ngut ki khlieh nongsynshar jong ka Hima Mylliem kila ia soi lang bad phah ia ka jingthoh sha ka tnad kam poh iing ka sorkar pdend ban ujor pyrshah ia ka jingiasoi pynbeit pud hapdeng ka jylla Meghalaya bad ka jylla Assam ia ki jaka ba don ka jingiakam kaba mar kylliang.
Ha kane ka jingiaujor kaba la phah sha ka tnad kam poh iing ki khlieh nongsynshar ka long ba kane ka jingiakren pynbeit pud kam shym don kata ka jingiamir jingmut lang bad ki traishnong bad ki khlieh nongsynshar shnong bad ia ka District bad kane ka jingiasoi ka long pyrshah ia ka mon jong ki paidbah.
Ha ia dei bad kane ka jingiapynbeit pud bad ka jylla Assam na ka liang jong ka United Khasi bad Jaintia Hills District naduh u snem 1974 bad kala kren shai ba ka jingiapynbeit pud kan long katkum ka jingpynbna sorkar jong u snem 1876 hynrei kane ka jingiasoi soskular ka khlem burom ia kane.
Ha kane ka jingujor kaba la phah sha Delhi la kdew ba ha ka 12.07.1967 la shim ia ka rai ban pyntrei kam ia ka jingpynbna jong u snem 1876 ia katei ka rai la pdiang da baroh ar liang hynrei ia kane kim shym la pdiang lane ban pyntrei kam ia katei ka jingpynbna.
Ki briew kiba im bad rep ha Pillangkata, Khanapara khappud ka jylla Assam kim kwah ban shah pynhap hapoh ka jylla Assam ki kwah ban don hapoh ka jylla Meghalaya bad kane ka jaka ka iar kumba 1.77 kilo metter sawdong kaba hap hapoh Khanapara bad Pillangata.
Ki briew kane ka jaka kila pynpaw lyngba ki lat bapher bapher ba kim kwah ban leit sha Assam la kyrpad ia ka tnad ba peit ia ki rielwum ba kan shim khia ia kane ka kam namar ki briew ki kwah ban don bad ka jylla Meghalaya katkum ka jingpynbna jong ka sorkar ha u snem 1876.
Ia kane ka jingujor la phah sha ka tnad kam poh iing jong ka sorkar pdeng lyngba u MP jong ka Shillong Parliamentary Constituency, ia kane ka jingujor la soi da u Acting Syiem jong ka raid Hoppati, Kharpati Ri Bhoi District, ki Lyngdoh, ki Basan, Ki Raid ruh kum juh baroh ki don khatlai tylli ki khlieh nongsynshar.
