Shillong, Nohprah 12 : La kan dei ka Nongkseh ne ka Shillong Lajong, kawei ka kynhun la tikna ba kan ioh ban lehkmen ia kaba kam pat ju ioh ban leh hashuwa kane ha ka janmiet jong ka sngi Saitjain, katba kiwei kin sakhi ia ka jingrem jong kawei na ki kynhun kabym pat mad ia ka jingrem ha kane ka samoi kaba mynta.
Namarba kan don tang kawei kaban iohrah la shai ka janmiet sngi Saitjain, kaban dei ka trophy kaba nyngkong eh jong kiba iohrah ia ka SSA Champions Cup 2025 bad la shai ka sngi Saitjain yn iakhun hapdeng ka Nongkseh SC bad ka Shillong Lajong ha SSA Stadium ha Polo ha ka por 4:30 baje janmiet.
Ka Nongkseh bad ka Lajong kim pat mad ia ka namrem ha kino kino ki jingiakhun jong ka Shillong Sports Association mynta u snem, hynrei ba ka dei pat ka final, kawei na ki kin mad ia ka namrem bad kawei ia ka namjop.
Kine ki ar tylli ki kynhun ki la iakynduh teng ha kane ka tournament, namarba baroh ar ki don ha ka Group B, bad ki la pynkut ia ka jingiakhun jong ki da 1-1. Ka SSA Stadium ka la dap smam ha katei ka 4 tarik u Nohprah bad la khmih lynti ba lashai ka sngi kan long ka final kaba itynnat bad bashongshit.
Haba ia lehkai ha ka Shillong Premier League, ka Lajong ka khlem lah ban pynneh ia ka jingjop jong ka kaba ka la iohrah ha u 2024, hadien ba ka la pynkut ha ka kyrdan baar, hadien ka Langsning.
Ka SLFC ka donkam ban jop ia ka jingiakhun bakhatduh jong ka, hynrei ki la iakhaid pynban da 0-0 haba iakhun pyrshah ia ka Nangkiew Irat. Watla ki la wan baar, hynrei ki khlem shah rem na ki khyndai tylli ki jingiakhun jong ka SPL 2025,ka la jop san sien bad iakhaid saw sien. Hynrei ka Lajong ka la iohrah pat ia ka SSA Super Cup kaba dang pynmih thymmai, kaba la jop baroh ar sien ki jingiakhun jong ka.
Katba ha ka Champions Cup, ki la jop lai sien ha ka Group B, la iakhaid tang pyrshah ia ka Nongkseh. Ka SLFC ka la jop ia ka jingiakhun jong ki ia ka semifinal da 2-0 pyrshah iaka Meghalaya Police ha ka sngi Balang. Kaba la pynlong ia ka ba kan ym mad ia ka namrem wat hadien 16 sien ialehkai, naduh ba sdang ia ka SPL ha u bnai Nailar.
Na ka bynta ka Nongkseh pat, ka jingiaid lynti jong ka ruh ka long kaba sngewtynnat bha, watlada kam bun ruh. Haba ialehkai ha First Division, ki la jop baroh khyndai tylli ki jingiakhun bad ban iohrah ia ka Trophy, kumjuh ban kiew sha ka SPL ban ialehkai haka samoi kaban wan, kala shah thep tang ar kol ha kane ka jingiaid lynti jong ka. Ka Super Cup ka dei tang na ka bynta ki kynhun SPL, kumta ka Nongkseh kam shym la iohlad ban tynjuh bor ia lade hangtei.
Ha ka Champions Cup ki la jop lai tylli bad iakhaid kawei ka jingiakhun haka group. Hynrei ha ka semifinal pyrshah ia ka Langsning ha ka sngi Hatmajai ka la shah tynjuh jur bha. Ka Langsning kaba la iohrah lai sien ia ka SPL ka la pynkyndit ia ka haba ka la lah ban thep ar kol tang hapoh ka 20 minit. Hynrei ka Nongkseh ka la iakhun tyngeh bad pyneh ki thied ki jaw bad ki la ioh ban pyniakhaid. Ka jingiakhun ka la poi sha ka jingiashut penalty, bad ka Nongkseh ka la jop da 4-3 ia kaba iakhun pyrshah.
Ka Nongkseh ka la sei bun ki rangialehkai donsap ha kane ka samoi, bun na ki ki dei kiba la mad ia ka I-League bad kiba la ih bha. Ki bun kiwei ruh kiba kham paw, hynrei kiba kham tbit ki dei u Chesterpaul Lyngdoh, Kynsaibor Lhuid, Kitboklang Pale bad u Hardy Cliff Nongbri, kiban hiar thma na sha khmat.
U Mebankhraw Wahlang, Banpynkhrawnam Nongkhlaw bad u Banskhemlang Mawlong, ki ruh ki long kiba kyrpang ban hiar thma ia ka Lajong. U Daraphun Talang, uba la ioh ban khanglad ia ka penalty haba jop pyrshah ia ka Langsning u la ap kol bha wat hadien ba u la shah thep ar kol hashuwa kane.
Na ka bynta ka Lajong, u Riborlang L Lyngkhoi u la sdang ia ka tournament da ar tylli ki hat-trick, hynrei hadien kane u la kynjah jar. Hynrei ki don kiwei ruh kiba tbit kum u Babysunday Marngar bad u Deibormame Tongper, kiba lah ban pynma ia ka kynhun ba iakhun pyrshah.
U Iohborlang L Lyngkhoi, u dei sa uwei bad u Samchaphrang Lato ruh uba tbit ba ialehkai napdeng (midfield), u Wilbert Marbaniang u donsap ha bak bad ka jingtbit jong u Wanteilang Malngiang ha kol, kaba mut ka Lajong kan aireng tikna ia ka Nongkseh.
Ha ka jingialang bad ki lad pathai khubor mynta ka sngi Thohdieng, baroh ar ki kynhun -ba la mih khmat da u Wilbert bad manager Lekini Suting na ka Lajong bad u Hardy Cliff bad u coach Richard Nongneng na ka Nongkseh – ki la ong ba kin mih madan beit kumjuh kumba ju ialehkai, ban pynbyrngia ia ki nongkyrshan kumba ki la leh ha kine ki bnai ba la leit.
Ka kynhun kaban iohrah ia kane ka SSA Champions Cup 2025 kin ioh khung ia ka song pisa kaba 8 lak tyngka, kaba dei ka khusnam kaba heh tam ha kino kino ki football tournament ha Meghalaya. Katba kaba wan baar kan ioh ia ka khusnam pisa kaba 4 lak tyngka.
Wat khlem kato ka cheque, ka jingiakhun jong ki ka dei ia ka trophy, ka burom, ka jingkmen jong ki nongkyrshan jong ki bad ka jingsngewsarong naka bynta ki player bad ki support staff, kaba ki la buh thong baroh shikatta.
Na ka bynta ki club, baroh ar ki la don la ki jong ki history kiba jrong ha ka sport, hynrei ka rekod jong ka Lajong khlem artatien ka kam bun. Ka Nongkseh ka la dep pynpaw lypa shuwa kane mynta ka samoi bad kin ot ia u cake jong ki da kaba jop la shai ka sngi. Hynrei ka Lajong ruh kan ym ailad satia na ka bynta ka burom jong ki, kaba la trei shitom bad jop ia ki jingiakhun da ki snem mynta, naba ka long kawei na ki kynhun ba khlain ha Meghalaya, kaba baroh ki kwah ban pynliem ia ka.
