Shillong, Risaw 29: ka jingduh long myntri jong u Bah Vincent H Palat ha ka sorkar pdeng kan ktah ia ka seng Congress ha kane ka jylla Meghalaya khamtam eh ha ki lum khasi. Kane ka la dang pynduh mynsiem ia ka seng namar ka jingpynkhreh ia ka election sha ka iing dorbar thawain ka jylla ka la iaid sha khmat ia kaba yn long ha u snem ban wan 2013.
Khlem da pynpaw kyrteng bun na ki nongialam jong ka seng Congress kiba dei na khasi hill ki pynpaw ba kane ka dei ka jingktah ka kaba jur bha ia ka seng namar ha kane ka jylla Meghalaya khamtam ha ri lumkhasi ki briew kim but ia unongialam hynrei ki but ia u briew ba long nongmih khmat.
Kane ka jingshah wegnoh jong u Bah Palat na ka kam myntri ha ka sorkar pdeng kan ailad ia ki liang pyrshah ban kynthoh ia ka seng congress nalor ba ki la mih shibun ki jingiaknieh tiket hapoh jong ka seng. (SP News Agency)
