Shillong, Iaiong 14: U MLA jong ka 17 North-Shillong u bah Adelbert Nongrum mynta ka sngi 14/Iaiong/2026 u la leit jngoh ia u shongknor jong ka Green Tech Foundation u bah H.B. Nonglang u ba la pynlong ia ka jingshah thngan jong u ban pyrshah ia ka soskular kaba sorkar ka iasoi bad ka Taj Company ban aiti 66 akar kynthup ia ka Lumpongdeng ban shna hotel.
Kane ka jing leit jngoh jong u MLA ka North-Shillong ka long ban ai jingkyrshan ia kane ka jingiakhih jong kine ki samla rangbah u la ong ba kum u nongmihkhmat um sngewlah ban shu shong khlem da wan ai mynsiem ia ki.
Haba kren ha lat pathai khubor ha kane ka jingleit jngoh ia u bah Nonglang u la ong ba na ka liang jong u ruh un iaid la ka jong ka lynti namar ia u la jied da ki paidbah bad ban pyntikna ba ka sorkar kan pynduh noh ia kane ka soskular namar ka ktah ia ka pateng kaba mynta bad ia ka pateng ka ban sa wan.
U la ong ba kine ki khun samla kim dei ban sngew ba ki shah ieh bad ha kajuh ka por u kyntu ia ka jaitbynriew baroh ba kin duwai lem na ka bynta jong ki bad u la pynkynmaw ba u la wanrah ia kane ka mat kaba iadei bad u Lumpongdeng hapoh ka iing dorbar.
