Ba pynrung ia ki shipai ha ka electoral roll dawa weng noh ia u Niak na ka kam CEO

Shillong,Naiwieng 08: Ki 14 tylli ki sengbhalang kiba kynthup ia ka KSU,FKJGP,HNYF,GSU,JSU, RBYF,JYF, CSWO, KWADDA, AJYWO, AYWO,ADE,AIGU bad FAF kiba ieng skhem ha ka nongrim ban dawa na ka sorkar ban pyntreikam ia ka Inner Line Permit(ILP) kila pynpaw ia ka jingsngewkhia halor ka jingailad ka Tnad Election jong ka jylla ia ki shipai bad ki bar jylla ban pynrung kyrteng ha ka Electoral Roll jong ka Madanriting.

U President ka KSU u samla Daniel Khyriem ula ong ba ki 14 tylli ki sengbhalang ki pynrem jur ia ka jingleh ka tnad Election jong ka jylla bad kum kine ki jingjia la lap bara bor ba dei kane ka tnad kaba long kum ka shlem na ka bynta ban pynroi shuh shuh ia ki bar jylla ha kane ka jylla bad ia kane ka tnad la pyniaid da u Chief Electoral Officer(CEO) u P Naik uba na ka por sha ka por u ju thmu ban pynbun shuh shuh ia ki bar jylla ban iohrung ha ka Electoral Roll jong ka jylla.

Ha u snem 2012, “ngi la pynlong ia ka jingiakhih halor ka jingpynmih ka Tnad Election ia ka Special Counter bad kum kine ki mih dei na une ujuh u briew uba long u diengpynkiang ia ka jingshongsuk shongshngain bad ia ka jinglongtrai ki trai shnong hapoh ka jylla bad une ujuh u briew u long u diengpynkiang ban pynjot bad ban pynbun briew shuh shuh ia u bar jylla hapoh kane ka jylla.Ngi ki 14 seng, ngi sngew ba ngim donkam shuh ia une u briew ba un dang long kum u khlieh uban peit ia ka tnad election ha ka jylla jong ngi bad ngi khmih lynti ba ki bor bahalor bad ka sorkar jylla kadei ban shimkhia bad kadei ban shim ia ka jingkitkhlieh bad ngim kwah ba une ujuh u briew un dang bteng ban shakri ia kane ka kam bad ngi kwah ban don noh da u briew lajong uba sngewthuh ia ka jingeh, ka khia ka shon jong ka jaidbynriew bad ka jylla hi baroh kawei”.

U tei u nongialam ka seng KSU u la ong ba “Ngi kyntu ia ki Dorbar Shnong ba kidei ban shim ia ki sienjam kumba ka Dorbar Shnong Madanriting kala shim ia ka rai rangbah ha kaba kala pyndonkam hok iala ka iktiar kum ka Dorbar Shnong bad kam shym la sngap ia ka tnad Election, bad ki Dorbar Shnong kim dei than ban shu kohnguh ia kaba ka tnad Election ka leh na ka por sha ka por, hynrei dei ban pyni iala ka iktiar kum ka Dorbar Shnong ha kaba ka jaidbynriew baroh ka ithuh bad niewkor ia ki Dorbar Shnong bad ia ki nongsynshar shnong kiba ki paidbah kila ai ha ki ia ki iktiar kiba khlain. Ki Dorbar Shnong ki long ka stieh ban iada ban nym ailad ia ki bar jylla ban rung ha ka Electoral Roll bad shisien ba u bar jylla ula iohrung ha ka Electoral Roll bad ngin shah jop ha ki ha ka synshar khaddar bad khlem artatien ha kawei ka sngi ki bar jylla kin ioh ban shong hapoh Secretariat”.

Kine kiei kiei ki iai mih kadei tang na u P Naik uba sdang ban pynklumar khlieh ia ka jylla bad ia ka jaidbynriew bad ngi iohi barabor hi ba kita ki nongmihkhmat jong ngi kiba ki paidbah kila pynkup bor kim nud ban saham ia une ujuh u briew bad kane ka pawshai ba maki ruh ki long ki niangkohnguh. Kala dei ka por ia ki ruh ban pyrkhat thymmai ba kum ka jaidbynriew bad ka jylla hi baroh kawei la donkam ia u trai muluk ban shong ha katei ka shuki ban pyniaid ia ki kam ha baroh kawei ka jylla na ka bynta ka jingshongsuk shongshngain jong ka jaidbynriew bad ka jylla hi baroh kawei.

Ba lada kine ki dang iai bteng ngim banse ban shim da kiwei ki lad ki lynti, ngin nym shha jem ne ban shu sngap sah ia ka jingleh ka Tnad Election jong ka jylla hapoh ka jingialam u P Naik la pynkut u Daniel Khyriem.(SP News)