Shillong, Kyllayngkot 18: Ka dor na ka bynta ki mar bapher bapher ban pyndonkam da ki kyrtong ha ki por ba ki leit ialap elekshon la buh bad pynbeit da ka Standing Committee on Model Code of Conduct (SCMCC) jong ka East Garo hills district hapoh ka jingpeit jong u Vijay Kumar Mantri kum u chairman.
Ia ka dor la buh hadien ba baroh ki dkhot jong ka SCMCC ki la ia hap jingmut bad mynjur ia ka jingai jingmut jong u Mantri.
Haba kren ha u nongthoh khubor, u Mantri u la iathuh ba ki dkhot jong baroh ki seng sain hima ba la ithuh da ka Election Commission kin long ki dkhot jong ka Standing Committee.
U Mantri u la iathuh ruh ba ia ka dor la mynjur hadien ba la iatai sani bha bad ki nongmihkhmat jong ki seng sain hima, kiba la iapoi sha ka jingialang.
U la ong, katkum ka jingong jong u, kine ki dor kin long shi bynta jong ka jingpynlut kaba T.8 lak ba la buh na ka bynta uwei pa uwei u kyrtong da ka Election Commission.
Ha katei ka jingialang ki la don lai tylli ki jingai jingmut ha kaba iadei bad ka jingbthah jong ka Election Commission. Ia ka jingai jingmut na ka bynta ka jingpynlut la wanrah da u additional deputy commissioner (election) SB Marak, ka jingai jingmut halor ka moral code of conduct ba la wanrah da u Returning Officer ka Kharkutta MK Marak bad ka jingai jingmut halor ka jinglong kyrtong da u Returning Officer ka Rongjeng, u Bhupesh Hajong.
Ka election department jong ka East Garo Hills districtr ka la trei ruh ia ka bynta ban weng noh ia baroh ki banner Christmas bad Snem Thymmai ba la buh da ki kyrtong bapher bapher ha ka district namar ka jingbuh sah ia ki kan lah ban ialam sha ka jingpynkhein ia ka ain elekshon.
