Shillong, Iaiong 16: Mynta ka sngi 16/Iaiong/2026 ka Kabinet ha ka jingiashong jingialang kala shim ia ka rai ba ka ktien Khasi bad Garo kin long noh ki ktien sorkar ha ka jylla Meghalaya bad ia kane ka sorkar kan sa wanrah ha ka Meghalaya Official Language Ordinance 2026.
Haba kren ha ki lat pathai khubor hadien ka jingialang ka Kabinet u myntri rangbah u la kren shai ba ha ka jylla mynta ka ktien sorkar kan dei ka phareng, ha Ri Lum Khasi kan long ka ktien Phareng bad ktien Khasi bad ha Ri Lum Garo kan long ka ktien Phareng bad ka Ktien Garo.
U myntri rangbah u la ong ba ia kane ka rai ka Kabinet kaba la shim mynta ka sngi ka long ban nang pynbiang shuh shuh ia ka jingdawa ban pynrung ia ka ktien Khasi bad ktien Garo ha ka khyrngit kaba phra ka riti synshar jong ka Ri India.
Nangne sha khmat haba ka sorkar Meghalaya kan pynmih ia ka jingpynbna sorkar ha ka Gazette kan long ha ka ktien Phareng, ka ktien Khasi bad ha ka ktien Garo hynrei ka jingiakren bad ka jingphah jingtip hapdeng kawei ka distrik sha kawei pat kan long ha ka ktien Phareng bad ha ka jingthoh ha ki phail kan long beit da ka ktien phareng haba ia dei bad kane ka sorkar kan sa shna ia ki rule.
U myntri rangbah u la ong ba ka jingpyndonkam ia ka ktien phareng yn nym pynsangeh kine ki ar tylli ki ktien ki long ban bynrap hynrei ka ktien phareng kan long pdeng bad kam dei ban don kano kano ka jingthut ha kaba phah ia ki jingtip kata ka dei ka rai kaba kila shim mynta ka sngi.
Haba ia dei bad kane ka rai u myntri rangbah u la ong ba u la ia kren ia kane ka kam bad u lamphang ka iing dorbar thawain ka jylla bad na ka liang jong u lamphang u la pynpaw ia ka jingsngewkmen bad u la ong ba ha ka iing dorbar kaba thymmai ka dei ban don ka rukom ba ki nongmihkhmat kin ioh ban kren ha ka ktien lajong hooid ban leh ia kane kan don ka jinglut ba ngi hap ban pynbiang ia ki briew.
