Shillong, Jymmang 30: U Myntri Sorkar Pdeng ba dei peit ia ka Tnad Youth Affairs and Sports, u Dr. Mansukh Mandaviya, mynta ka sngi u la plie paidbah ia ka Integrated Multipurpose Indoor Sports Complex ha Shillong bad u la sakhi ruh ia ka jingiasoi ia ka Host State Contract na ka bynta ka 39th National Games 2027 hapdeng ka Sorkar Meghalaya bad ka Indian Olympic Association (IOA).
Ha kane ka prokram la iadonlang u Myntri Rangbah ka Jylla Meghalaya u Conrad K. Sangma, ka Myntri Khynnah jong ka sorkar pdeng ba dei peit ïa ka Tnad Youth Affairs and Sports ka Raksha Khadse, u Myntri ka Tnad kam ialehkai jong ka jylla Meghalaya u Bah Wailadmiki Shylla, President jong ka Indian Olympic Association ka P. T. Usha, u Chief Secretary ka jylla Meghalaya u Dr. Shakeel P. Ahammed, ki heh ophisar, ki nongïalehkai bad ki nongmihkhmat jong ki seng ïalehkai bapher bapher.
La tei ha ka jinglut kaba T.132.9 klur, ka Integrated Multipurpose Indoor Sports Complex kadei ka jaka ban pynlong ia ki jingïalehkai bapher bapher kaba la biang katkum ka juk mynta kaba lah ban pynlong ïa ki jingïalehkai basketball, badminton, volleyball bad kiwei kiwei ki jingïalehkai hapoh ïing.
Ia kane ka jaka la thmu kum ka jaka ba kongsan na ka bynta ka lympung ialehkai National Games kaba 39 bad ka kynthup ia ki hall ba lah ban pyndonkam ha ki rukom bapher bapher, ka auditorium bad kiwei kiwei ki jaka ba la pyniasoh lang.
Haba ai jingkren ha kane ka jingialang, u Dr. Mandaviya u la ong ba ka jingplie ïa kane ka complex ka long kum ka jingplie ïa ka khyrdop sha ka lawei jong ka jylla Meghalaya lyngba ka kam ïalehkai.
Haba kren shaphang ka jingplie ïa kane ka jaka lyngba ki jingkhang jong ka ha ka jaka jong ka jingïalang khap ribon, u la ong ba ka pyni ïa ka jingplie ïa ki lad ki lynti kiba thymmai na ka bynta ki samla jong ka jylla Meghalaya bad ka thaiñ shatei lammihngi.
Haba batai ia ka kam ialehkai kum ka hok ba kongsan bad ka atiar kaba khlain jong ka roi ka par, u Myntri Sorkar Pdeng u la ong ba ki jingbei tyngka ha ki jingdon jingem ba iadei bad ka kam ialehkai kidei ki jingbei tyngka ia ka lawei jong ka imlang sahlang.
U la ong ba kane ka complex kaba dang plie thymmai kan kyntiew ia ki nongialehkai ki ban wanrah nam bad burom ia ka jylla Meghalaya bad ka India ha ki rynsan ialehkai ha ka ri bad shabar ri.
Haba ban jur ïa ka jingkut jingmut jong ka Sorkar India ban kyntiew ïa ki nongïalehkai, u Dr. Mandaviya u la ong ba ki rukom treikam kiba pynshong nongrim ha ka science ha ki kam ïalehkai ki nang kham bun ban ithuh bad kyntiew ïa ki sap.
U la ong ruh ba katba ka thaiñ shatei lammihngi ka don tang kumba saw percent na ka jingbun briew jong ka ri India, hynrei ka pdiang ïa jan 25 percent na ki Khelo India Centre jong ka ri, kaba pyni ïa ka jingdonkam jong kane ka thaiñ ha ka jinglong jingman ka kam ialehkai jong ka ri India.
Haba kren shaphang ka National Games kaban sa long shen, u Dr. Mandaviya u la ong ba ka Meghalaya ka la shim ïa ka jingkitkhlieh kaba khraw da kaba mynjur ban pdiang ïa kawei na ki lympung ïalehkai kaba heh tam ha ka ri India kaba ïashim bynta palat 8,000 ngut ki nongïalehkai.
U la pynpaw ka jingshaniah ba ka National Games kaba 39 kan buh ia ki nuksa kiba thymmai ha ka jingtbit ha ka jingïalehkai bad ka jingpynïaid ïa ki kam.
U Myntri Sorkar Pdeng u la ban jur ruh ia ka lad kaba khraw ba ka jylla Meghalaya ka don ha kaba iadei bad ka kam jngohkai pyrthei, ka kam pdiang briew, ka roi ka par kaba iaineh bad ka rep ka riang kaba khlem ber dawai.
Haba kren shaphang ka jingthmu ban shna ïa ka High Altitude Training Centre ha Meghalaya, u la ong ba kane ka jaka kan plie ki lad ki lynti ban ai jinghikai katkum ka juk mynta ïa ki nongïalehkai na kylleng ka ri bad kan nang pynkhlaiñ shuh shuh ïa ka jinglong jingman ka kam ïalehkai jong ka India. U la pynpaw biang ïa ka jingkloi jong ka Sorkar India ban kyrshan ïa kane ka projek.
U Dr. Mandaviya u la ïaroh ïa ki sienjam ba heh jong ka Meghalaya ha kaba iadei bad ki jingdon jingem na ka bynta ka kam ïalehkai, kynthup ïa ka jingtei ïa kaei kaba la khmih lynti ba kan long ka madan ïalehkai phutbol kaba heh tam ha India bad Asia ha ka jinglut kaba la antad haduh T.700 klur.
Haba kren shaphang ka jingthmu “Play in India” jong u Myntri Rangbahduh ka ri u Narendra Modi, u la ong ba kum kine ki jaka ki lah ban khring ia ki lympung ialehkai nabar ri bad kan plie ki lad kamai na ka bynta kane ka thain.
U Myntri Sorkar Pdeng u la kren ruh shaphang ka jingtyrwa ban seng ia ka High Altitude Training Centre ha NEHU, ia kaba ka sorkar India ka kloi ban bei tyngka kumba T.150 klur. U la ong ba kane ka jaka kan plie ki lad ki lynti ban ai jinghikai katkum ka juk mynta ia ki nongialehkai na ka jylla Meghalaya, ka thain shatei lammihngi bad na kylleng ka ri.
Haba kren shaphang ka lad ba ka Meghalaya ka don ha kaba iadei bad ka rep ka riang, u la ong ba ka jylla ka pynmih ïa ki jait soh bad ki jhur organic kiba bun jait bad ka don ha ka kyrdan kaba biang ban long ka nongshalan ba kongsan ia ki mar rep organic kiba bha tam.
U la ai jingmut ba ki jingïatreilang kiba kham khlaiñ ki lah ban ïarap ban pynïasoh ïa ki mar jong ka Meghalaya bad ki iew jong ka ri bad ban wanrah ïa ki lad ki lynti kiba kham bha na ka bynta ki nongrep.
U Dr. Mandaviya u la ban jur ruh ïa ka jingthmu jong u Myntri Rangbahduh ban pynkhlaiñ ïa ka jinglong jingman ka kam ïalehkai jong ka India lyngba ka Khelo Bharat Mission, ha kaba ki nongïalehkai ba pawkhmat kin seng ïa ki club bad ki academy ryngkat ka jingkyrshan jong ka sorkar.
Haba pynkynmaw biang ia ka jingangnud jong ka India ban pynlong ia ka Olympic Games ha u snem 2036, u la ong ba ka ri ka thmu ban don napdeng ki shiphew tylli ki ri kiba hakhmat duh ha ka jingioh takma Olympic ha kata ka por bad napdeng ki san tylli ki ri kiba khlain bha ha ki kam ialehkai ha ka pyrthei ha u snem 2047.
Habaai jing kren ha kane ka sngi, u Myntri Rangbah ka Jylla u Conrad K. Sangma u la kdew ïa kane ka sngi kum u mawmer ba kongsan na ka bynta ka Jylla Meghalaya, ka thaiñ Shatei Lammihngi bad ka ri.
U la ong ba ka jingsoi ia ka Host State Contract bad ka jingplie ia ka indoor complex ka pyni ia ka jingkut jingmut ba iaineh jong ka jylla na ka bynta ka kam ialehkai bad ka jingkyntiew ia ki samla.
U Myntri Rangbah ka jylla u la ban jur ba haduh 80 per cent na ki jingdon jingem ba iadei bad ka kam ïalehkai jong ka Meghalaya kidei kiba la wanrah ha kine ki phra snem ba ladep, ha kaba la shna kumba 80 tylli ki madan ïalehkai ha kylleng ka jylla.
U la ong ba ka sorkar ka la bei tyngka man ka por ban kyntiew ïa ki nongïalehkai lyngba ka jingpynbiang ïa ki jingdon jingem, ki prokram scholarship bad ka sienjam STAR, kaba ithuh bad kyntiew ïa ki samla kiba don sap ha ka kam ïalehkai naduh dang rit.
U Sangma u la ong ba ka jingangnud jong ka Meghalaya ka long ban pynmih ia ki nongialehkai kiba lah ban iakhun ha ki kyrdan ialehkai ba ha khlieh duh jong ka ri bad shabar ri.
Haba pynpaw ka jingngeit skhem ba ki nongïalehkai na ka jylla Meghalaya bad ka thaiñ shatei lammihngi kin wanrah nam bad burom ïa ka ri India ha ka Olympic Games ka ban sa wan, u la batai ïa kane ka jaka ba dang plie thymmai kum ka dak jong ka jingangnud, ka lad bad ka jingkyrmen na ka bynta ki pateng ki ban sa wan.
U Myntri ka Tnad kam ialehkai ka jylla Meghalaya u Bah Wailadmiki Shylla u la kren shaphang ka jingpyniar sted ia ki jingdon jingem ba iadei bad ka kam ialehkai ha kylleng ka jylla.
U la pyntip ba haduh 240 tylli ki projek ba iadei bad ki jingdon jingem na ka bynta ka kam ïalehkai ki la dep, ki dang ïaid shakhmat ne dang shna, bad la khmih lynti ba ka jingdon kan palat ïa ka 510 tylli ki projek shuwa u snem 2028.
U Bah Shylla u la ong ruh ba ka Sorkar Meghalaya ka la mynjur T.72.51 klur na ka bynta ki jingpynkhreh kiba ïadei bad ka 39th National Games. U la ong ba palat 50,000 ngut ki samla ba don sap la ithuh bad dang kyntiew lyngba ki prokram ba la buh ryntih, kaba pyni ia ka lad kaba heh na ka bynta ki samla jong ka jylla Meghalaya bad ka jingangnud jong ka jylla ban kyntiew ia ki nongjop ha ki por ban wan.
Ka President ka Indian Olympic Association ka U P. T. Usha, ka la ai khublei ia ka Sorkar Meghalaya na ka bynta ka jingshimkhia bad ka jinglong nongialam jong ka ha kaba pynkhreh ia ka National Games. Ka la batai ïa ka jingsoi ïa ka Host State Contract ba la pynkylla thymmai kum ka sienjam kaba kongsan ban pynpoi ïa ka National Games ka ban ai mynsiem ïa ki nongïalehkai, ban pynkhlain ïa ka jingïatylli jong ka ri bad ban wahrah ia ka kam ialehkai kaba khlain bha.
Ka Usha u la ong ba ka National Games kaba 39 kan long kaba kongsan namar, ha ka sien kaba nyngkong, yn pynlong ïa ka lympung ïalehkai ha kylleng ka thaiñ shatei lammihngi. Ka la ong ba kane ka Lympung ialehkai kan ai ka lad ban pyni ia ka sap ka phong, ka kolshor bad ki jingangnud jong ka thain shatei lammihngi sha ka ri baroh kawei.
Haba kren shaphang ka jingdonkam ban ithuh ïa ki sap bad ban kyntiew ïa ki nongïalehkai, ka la ong ba ka jingïapher hapdeng u nongïalehkai uba don jingkyrmen bad u nongjop bunsien ka shong ha ka lad, ka jinghikai katkum ka science, ka jinghikai kaba bha bad ka jingkyrshan kaba neh.
Ka la ïaroh ruh ïa ka bynta ba kongsan jong ka Meghalaya State Olympic Association bad pynpaw ka jingngeit skhem ba kane ka Lympung ialehkai kan long ka dak jong ka ri India kaba sngewskhem, kaba angnud bad kaba ïatylli, ha kaba ka thaiñ shatei lammihngi kan long bynta pdeng jong ka lawei jong ka kam ïalehkai jong ka ri.
Ka jingplie ïa ka Integrated Multipurpose Indoor Sports Complex bad ka jingsoi ïa ka Host State Contract na ka bynta ka 39th National Games 2027 ka pyni ïa ki mawmer ba kongsan ha ka jingïaid lynti ka kam ïalehkai jong ka Meghalaya bad pynskhem biang ïa ka bynta ba nang kiew jong ka jylla ha ka jinglong jingman ka jingkiew ka kam ialehkai jong ka ri India.
