Shillong, Jylliew 23: U Chancellor jong ka CMJ University Chandra Mohan Jha u la phah da ka shithi sha u president jong ka Ri India ban pyntip sha u ia kaei kaba la jia ha kane ka university da ka jingleh jong u visitor u ba dei u lat jong ka jylla Meghalaya.
Ha kane ka shithi na ka liang jong u chancellor u la batai ia ka jingleh jong u lat ka jylla Meghalaya bad u la kdew ha shithi ba kane ka jingleh ka ktah ia ka lawei jong ki khynnah kiba pule ha kane ka jaka ha kine ki lai snem mynta. Ka jingktah kamd ei tang ia ka University marwei.
Ha kane ka shithi la batai kumno ka jia naduh ba sdang ia kane ka jaka pule ha dien ba la pass ia ka CMJ University Act da ka iing dorbar jylla ka jylla Meghalaya. Ha kine ki lai snem ki la thoh bun ki jingthoh sha u Lat jong ka jylla hynrei ym shym la leh ei ei bad mynta kynsan u la shu hukum ban khang ia kane ka jaka pule.
Ha dien jong kane na ka liang jong u Lat ka jylla u la ai da ka FIR bad ka tnad CID ha kaba la khang tala ia kae ka jaka pule ban wad ia ki jingshisha ha kaba ia dei bad kane ka jaka pule. Naka liang jong u Chancellor u la pyntipsha u president jong ka Ri India ba ha kane ka jylla ki don shiphew tylli ki Private University hynrei kaba phylla ka long ba u Lat phah tohkit tang ia kane kawei ka university.
Kane ka jingleh jong u Lat ka jylla ka long ha ka por ba ka jinglong Lat ka jong u kan sa kut noh, na ka liang jong u Jha u la kyrpad ia u president jong ka Ri India ba un tuklar lem ia kane kam ban pynbeit ia ki jingeh baroh. Ia kane ka shithi la phah ruh sha ki ba bun ki nongialam sain pyrthei bad sha ki heh sorkar ha Delhi.
Ia kane ka shithi la phah sha u sha u Prime Minister, Vice President , HRD Minister, Home Minister, Law Minister, Finance Minister , Cabinet Secretary, Home Secretary, Speaker ka Lok Sabha , Sha ka Sonia Gandhi, Chairperson UPA and AlCC President, sha u Raj Nath Singh, BJP President, Chairman, UGC, Ia kane ka juh ka copy la phah ruh sha u Lat ka jylla, u myntri rangbah bad u myntri ba dei peit ia ka pule puthi ha ka jylla.(SP News)
