Jowai, Naitung 28: Na ka liang ki Ar seng ka JSU&JYF hynne ka sngi ki la leit ban ai da ka jingthoh ha u Chairman jong ka District Selection Commiittee DSC uba dei u Deputy Commissioner jong ka West Jaintia Hils District ban pan jingpynshai na u halor kano ka nongrim ba ka Committee ka ai lad ia ki bar jylla ban ioh lad ban bsut khlieh ban ia khun ia katei ka examination.
Kitei ki ar Seng hadien ba ki la ioh shibun ki jingujor na ki paitbah jong ka District bad khamtam na ki samla khlem kam, ki la shim khiah bha ban leit ia kynduh bad u Deputy Commissioner ka WJH ban dawa jingpynshai na u ba kumno hapoh ka District jong ngi ki bar jylla kin paw kyrteng ha ka list na ka bynta ka post Sericulture Demonstrator kum u Rajest Hajong bad u Sujit Kumar Barman kiba dei ki bar jylla ong u bah P.Majaw President ka JYF.
Shuh shuh kitei ki nongialam jong ka JYF bad JSU kiba trei met bad mynsiem na ka bynta ka jingbha jingmiat bad jinglong ryntieh na ka bynta ka jingbha ia baroh, ki pynpaw ba ki pyrshah jur ia ka ne ka jingleh thurmur jong ka District Selection Committee DSC ban ai lad ia ki bar jylla ban ia knieh ia ka hok ki trai Ri trai muluk ki bym pat don la ka kam ka jam kren bitar u samla Emperor Bareh General Secretary ka JSU Central Body.
Kumta na ka liang ka JYF bad JSU ki ailad shitaiew ia ka District Selection Committee DSC ban ai jingpynshai halor kano ka nongrim ba ki tei ki bar jylla ki paw kyrteng ha ka list jong ki ba passed ia ka ne ka post Sericulture Demonstrator pynkut u kyrwoh na kitei ki nongialam.(SP News)
