Jowai, Nailar 01: ka seng HNPF ka pynpaw ia ka jingsngew nguh kaba khraw shi katdei eh bad ai khublei kyrpang ia baroh ki paidbah jong ki ar tylli ki District kiba la kyrshan lang ia ka prokram iakhih jong ki ha kine ki ar miet lynter naduh ka 30 bad 31 tarik u Naitung, halor ki jingdawa jong ngi ban pynkynriah kam ia ki ar ngut ki heh Pulit kiba la palat ka por treikam jong ki, kiba don ha East Jaintia Hills District.
Ka seng ka kyntu ia ka sorkar ba ka dei ban pyntreikam ia ki rukom buh kyndon jong ka na ka bynta ki ophisar sorkar la kadei ia ki heh Pulit ne ia ki ophisar ba trei ha kiwei pat ki Department, ba ki dei ban don ha kano kano ka jaka ba ki trei tang hapoh 2 snem. Khamtam ka seng ka ban jur ia ka Home Department lyngba ka myntri ba dei peit ia ka Police Department ka kong Roshan Warjri ba ka dei ban pynkynriah kam noh mardor ia ki ar ngut ki heh Pulit u Bah W. Muksor bad u bah W. Rymbai kiba la don ha East Jaintia palat ia ka por bala buh bad lada ka sorkar kam pynsngap ia kane hapoh kine ki khyndiat sngi ka seng kan pynlong biang ia ki prokram iakhih kiba kham tyngeh shuh shuh.
Nalor kane ka seng ka pynrem jur ia uwei na kitei ki heh Pulit u bah Wanris Rymbai ba ula pynkhein ia ki kyndon ain jong ka Motar Vehicle Act 1988 ha kaba u la pyndonkam da ka juh ka number ia ki ar tylli ki kali ba u pyndonkam. Kat kum ka jinglap jong ngi bala pynsakhi da ki dur bala dep shon la lap ba utei u heh Pulit ula pyndait ia ka Plate kaba don ia u No. ML04 A 4000 ha ka kali Private jong u (Bolero rong saw jngum) bad da kane ka juh ka number u la pyndait ruh ha ka kali ba ula ioh kem (Bolero rong silver).
Kumta na ka liang ka seng HNPF ka kyntu jur ia ka sorkar bad iaka ophis jong u DTO ba kin pynshitom ia kum une u briew ba pynkhein bad uba nud ban leh thoh haduh katne nalor kata une u Wanris uba dei u nongbat ain. Ngi na ka liang ka seng ngi buh jingkylli ia ka tnad Pulit ba hato ynda phi la iohkem ia ki kali bala shah tuh, phin pyndonkam noh shalade? Ne phin hap ban phah sha ki bor halor bad ruh sha ka iing bishar ban leh ia kaba donkam? Lada ka sorkar kam peit ngor ia kum utei u heh Pulit kan sa poi ka por ba wat ki nongbat ain kin kylla nongtuh nonglute bad kane kan wanrah ka jingeh ia ki paidbah ba lui lui.(SP News)
