Shillong, Nailar 08: Ka Meghalaya Peoples Human Rights Council (MPHRC) kum kawei na ki Seng kaba ieng ban ia ksaid bad ban iada ia ka Hok Longbriew Manbriew ka dap da ka jingsngewkhia kaba khraw halor ki sienjam kiba la shim da ka KHADC halor ka jingthmu ban pyntreikam noh ia ka Bill phiah Constituency .
“Ka jingkwah ban phiah Constituency lyngba ka Bill kaba la wanrah dangshen da ka KHADC katkum ki kyndon ba la shna ha ka rule kaba 80, kaba 72 , 1,2 bad 3 ka 6th scheduled ka paw shai ba ka jingthmu kaba don sha lyndet ka dei beit thik halor kumno ban nang pynpharia shuh shuh ia ka jaitbynriew Hynniewtrep kaba lah ban wanrah ia ki jingma kiba bakhraw ha kaba bun ki liang bad kaba lah ban ktah ia ka iap ka im jong ka mynta bad ka lashai” ong u Bah Dino D.G. Dympep, Chairman ka MPHRC.
“Haba phai sha ka jingsynjor jong ka Synshar ka Khadar, ka ioh ka kot bad ka imlang sahlang kumba ka paw ha kine ki sngi, la iohi ba ka jaitbynriew ka la nangrit nangswai bad ka jingjyllei ki mynder ri kiba wan buhai shnong ha ka kyrteng ban kyntiew ia ka ioh ka kot jong ki Pait Trai Ri Trai Muluk, hynrei lyngba ki dak ki shin kiba paw shynna pat ki long ba ka thombor bad ka jingshah iuhroit ia ka ka Hok jong ki Paid Trai Ri Trai Muluk (Indigenous Peoples Rights) bad ka Hok Longbriew Manbriew (Human Rights) ki la kynrei bad nang roi sted haduh katta katta bad ka jingbynniaw ka long ba bun na ki nongmihkhmat ka KHADC kim nud satia ban kren ia ki jingshisha hynrei pynban ki bunkam bad pynlapmeit ialade tang kumno ban pyrkhat ia ka jingphiah constituency tang na ka bynta ka jingmyntoi shimet” kynthoh jur u Bah Dino D. G. Dympep Chairman MPHRC.
“Lah ban pynkynmaw hangne, ba katkum ka Kaiphod lum jingtip jong ka United Nations Working Group on Minorities in South Asia, 2006, ka la kren shai ba ha ka Ri India ki District Councils ki la hiar dor haduh katta katta namarba kim shim la lah ban pyntreikam ha ka ban iada bad kyntiew ia ka Hok jong ki Paid Trai Ri Trai Muluk katkum ki jingthmu ka 6th Schedule jong ka Riti Synshar ka Ri India” ong u Bah Dino D.G. Dympep, Chairman MPHRC.
Ka jingkylli mynta ka long ba haduh katno kata ka jingthmu ban phiah constituency kan wanrah jingmyntoi ia u paidbah u babun balang ne hato kata ka jingphiah constituency kan dei tang na ka bynta ka jingmyntoi shimet ki MDC ka KHADC? Pynkut ka kyrwoh ka MPHRC.(SP News)
