Shillong, Naiwieng, 27: Lai ngut ki thei iakhun kti kiba la mihkhmat ia ka Jylla ki la wanrah ia ka nam ka burom sha ka jylla Meghalaya hadien ba ki la ioh khur ia ka takma ksiar ha ka lympung World Arm Wrestling Championship, kaba la long ha Chandigarh naduh ka 21 tarik haduh ka 25 tarik mynta u bnai ia kaba la pynlong ha Gaurishankar,Punjab, daka Punjab Armwrestling Association (PAA).
Kine ki lai ngut ki thei samla ki kynthup ia ka samla Aiboklin Rina (70kg), ka samla Badalin Kharbyngar (55kg), ka Diana Jyrwa (50kg) bad u kynthuh ruh ia u samla Jerremy B Rangad (below 80kg).
Ia kine ki saw ngut kynthup ia arngut ki Official ka MAWA kiba kynthup ia u Bah Junestar Kharbuli bad u Arjun Seva, la pdiang burom ha Mawiongrim mynta ka miet da ki paidbah nongshong shnong kynthup ruh ia ka senglongkmie Mawiongrim.
Ka samla Aiboklin Rina, ka samla Badalin Kharbyngar bad ka samla Diana Jyrwa ki la jop ia ka takma Ksiar na kane ka jingiakop hynrei u samla Jeremy B. Rangad, u la jop ia ka kyrdan kaba saw.
Haba kren ha u nongthoh khubor hadien ka jingpdiang burom ia ki, u Bah June Star Kharbuli, General Secretary ka Meghalaya Arm Wrestling Association (MAWA) u la pynpaw ia ka jingsngew sarong haba kine ki lai ngut ki samla kynthei ki la lah ban jop ia kane ka khusnam, watla ka samla Aiboklin Rina kaba la iakhun ia ka overall ka la shahrem noh ha ka jingiakhun phainal.
“Ngi ai khublei nyngkong eh ia u Blei uba la don ryngkat bad ka kynhun, kumjuh ruh ia ki bahaing hasem bad ki paidbah kiba la ai mynsiem bad khamtam eh ia ka mynsiem trei shitom bad aiti lut ialade jong kine ki saw ngut kiba la mihkhmat ia ka Ri India ban aireng ia kiwei pat ki nongiakhun na kiwei pat ki ri.”(SP News)
