Shillong, Nailur 06: U myntri rangbah jong ka jylla Meghalaya u Dr Mukul Sangma haba plie ia ka Meghalaya Health Insurance Scheme (MHIS) hapoh jong ka Holy Cross Health Centre, Mairang, hapoh jong ka West Khasi Hills District u la ong ba ka sorkar kan sa ai ia ka Ambulance na ka bynta kane ka jaka ai jingsumar.
Ha ka jingkren jong u Dr Sangma u la ai jingiaroh ia ki hospital kiba la pyniaid da ki mission ha kane ka jylla Meghalaya namar ki la ai ka jingiarap kaba ratbah ia ki jingshakri ha ka liang ka koit ka khiah ha ka jylla.
Ka sorkar ka don ia ka thong kumno ban leh ban wan rah sha ka jylla ia ki lad jingsumar kiba biang na ka bynta jong ki paidbah nongshong shnong bad wat hapdeng ki jingeh kaba ki hospital ki bym dei jong ka sorkar ki ia kynduh ki la ialeh ban pynbiang ia ki jingdon kamjong ki paidbah ha ki liang jingsumar khamtam ha ki nongkyndong.
Haba ia dei bad ka jingkam ia ka jingsiew ha kaba sumar ia ki nongpang na ka skhim MHIS, u myntri rangbah u la ong ba ka bun na ki hospital jong ki riew shimet ban na ki hospital sorkar. Na kane ka sorkar ka sngewthuh ba ia ki hospital jong ki Mission dei ban pynkhlain shuh shuh da kaba ai jingiarap da ki kot ki bor kiba katkum kane ka juk kaba mynta.
U myntri rangbah u la ong ba la don kam ban kham pynshai paidbah ha kaba ia dei bad ka skhim MHIS ban sngewthuh kham bha bad ban dup lah ban pynioh ia ka jingpynrung kyrteng 100% ha kane ka snem ban wan. (SP News)
