Shillong, Naitung 31: Ka jingkyrshan jong ka Sorkar Jylla bad ka jing ioh bording na kiwei ki tnad kum NEEPCO bad na ka Central Grid ka la iarap ia ka jylla ban ioh bording ha ka por ba duna um palat ha dam Umiam. Ka jingdawa bor ding ka la kot shaduh 600 MW, bad la don kumba palat 3 Lakh tam ki paidbah kiba shim bad kiba pyndonkam ia ka bording, katba ka installed generation ka long 186.70 MW.
Ki la pyntip ba kumba ka long mynta ka Myntdu Leshka HEP (2 x 42 + 1 x 42) MW ka la nang iaid bad kyrshan bha ia ka jingsam bording namar ka jingbiang u slap sha kitei ki jaka.
Ki officer MeECL ki la pyntip ba ha shen kin sa buh ia ki Boundary Metering kiban sa iarap ia ka tnad ban tip katno ka jingjah hapdeng ka jingsam bording namar kum ba long mynta ki la ong ba ka jingjah ka bording ka long 4 % bad kane ka long kaba jia ha jan baroh ki tnad bording hapoh ri India, ki la ong ba ha NE ka jingjah jong ka bording ka long kumba 3.6%. Haba kylli ia ka jingtuh light ki heh MeECL ki la ong ba ki la shim bun ki lad ban iada na ka jingshah tuh light bad ha kiba bun ki khep ki la ai FIR bad ai pulit bad phah kem ia kiba tuh light, ha ka juh ka por ki la kyrpad ia ki paidbah bad khamtam ia ki bor shnong ban iarap bad ban ia treilang bad ki bor MeECL, khnang ban iada na ka jingshah tuh light.
Ha kaba ia dei bad ka jingpyntreikam ia ka Rajiv Gandhi Grameen Vidyutikaran Yojana (RGGVY), u Chairman MSPB u la rai ban pynlong ia ka jingkynduh kaba kyrpang ban ia kren halor ki jingeh kiba mih na ka jingpyntreikam ia katei ka scheme kaba kyrpang kaba la khot kyrteng ka RGGVY.
Ki officer ki la pynpaw ia ka jingsngew lait mynsiem ha kaba la ioh ban pyniaid noh ia ki trok na ka NHAI bye-pass, hynrei ha ka juh ka por ki la pynpaw ba ka don ka jingkhuslai namar kat nang iaid ki sngi nang bun ki kali rit kiba iaid man ka kynta lyngba ka main dam Umiam Lake, bad ki la kyrpad ia ki bor MSPB ban ai jingmut ban pynrkhat ban thaw ki lad surok thymmai ban pyniai ia ki kali rit namar ka main dam Umiam ka la dap 58 snem haduh kine ki sngi.
Shuh shuh ki officer MeECL ki la pynpaw ia ka jingkhuslai ka jinglynga pisa halor ka jingduna palat u slap haduh kine ki sngi kat haduh ba mynta ka pung Umiam ka dang duna sa kumba 60 foot ban dap kumba juh long mynshwa ha kum kane ka por.
Ka jingialang jong ka MSPB Working Group -1 ki la rai ban leit khmih da la ki jong ki khmat ia ki jingtreikam jong ka Myntdu Leshka HEP (2 x 42 + 1 x 42) MW bad ia ki jingtrei jong ka Umtru HEP project, bad la rai ban khot bad ban ia kynduh biang ia ka tnad MeECL bad ka Power Department ban ioh ban bishar bniah ia ka jingtreikam jong ki scheme bad ruh ban ia kren ia tai halor ka power policy jong ka jylla Meghalaya. Ia katei ka meeting la pyniaid da u Shri. Salseng C Marak, MLA, Chairman, MSPB, ha kjingiadonlang u Bah.John F Kharshiing, Co-Chairman, MSPB, Dr Manash Das Gupta, Dy Chairman, Dr (Smti.) Eureka Lyngdoh, Dy Chairman, MSPB, Shri. Grithalson Arengh, Dy Chairman, MSPB, and Shri. Abdul Hussain Sarkar, Dy Chairman, MSPB.(SP News)
