Shillong, Nohprah 09: Ka kynhun kaba la tip kum ka Thma-U-Rangli-Juki (TUR) mynta ka sngi ka la pynlong ia ka jingialang ha police bazar ban pyrshah ia ka jingdon jong ka ain yakjakor kum ka Meghalaya Preventive Detention Act (MPDA) bad Meghalaya Maintenance of Public Order Act (MMPO).
Ki dkhot jong kane ka kynhun ki dawa na ka sorkar ba ka dei ban pynkylla noh ia kane ka ain ka Meghalaya Preventive Detention Act (MPDA) bad ia ka Meghalaya Maintenance Public Order (MMPO), namar dei ha kine ki ar tylli ki ain bun na ki nongialam seng bhalang ki la shah pynngat.
Ka kong Angela Rangad ka la ong ba kane ka jingiaksaid ka jong ki kan long ka jingiaksiad ha barohkawei ka jylla bad ka dei ka hok jong ki paidbah ban pyrshah ia kine ki ain kiba long pyrshah ia ka hok long briew man briew. Ka kong Anglea kala ong ba ka MPDA bad ka MMPO ka ktah ia ka jingtrei kam jong ki iing bihsar.
Na ka liang jong ka TUR ka la kynnoh pyrshah ia ka sorkar ba ka la pyndon kam bakla ia kitei ki ar tylli ki ain namar ki shim noh ia ka hok jong u briew, katkum kane ka ain ka long ban pynngat tang ia kito ki briew kiba la leh ia ki kam pyntrei kiba sherkhei, hynrei katkum ka jingleh ka long ba ki pulit ki lah ban pynngat MPDA wat tang ia u bat uh type kali ruh.
La ong lada lah ban wengnoh ia ka ain TADA balei ym lah ban weng noh ia ka MPDA, kine ki ain kum ka MPDA MMPO ki dei ki ain tang ban pynkhein ia ka hok long briew man briew. La ong ba wat u nongleh kam sniew ba triem ruh u ioh ia la ka jong ka hok ban iada. La ong ba ha kane ka jingiakhih ban dawa ia ka ILP ha kane ka jylla ka kem 71 ngut bad don kiba la ngat ha ka ain MPDA.(SP News)
