Shillong, 19 Risaw: ka ophis jong u superintendent jong ki custom jong ka Tamabil mynta ka sngi ka la phah sha ki nongkhaii ba shallan dewiong sha Bangladesh ba mynta la niew ba u dewiong u la dei u mar iathied ha iew ha hat, kumta na ka liang jong ka ophis Custom bad Central Excise ka la pynngat khajna shi persent ia kaba la khot kum ka “advalorem” ne ka excise duty.
Katkum ki tyllong khubor kiba la ioh da u SP News Agency ki iathuh ba katkum ka jingphah jingtip na ka liang jong ka ophis ki custom ia kaba la ioh pdiang mynta ka sngi ka long katkum ka jingpynbna sorkar no 01/2011-CE katkum tarik 01/03/20011 da kane ka jingpynbna mynta u dewiong u ba juh phah sha Bangladesh u la ngat ha ka Excise Duty.
Na ka liang jong ki nongkhaii kila pynpaw ba balei ka ophis jong ka Custom bad Central Excise ka shim por haduh shi snem ban pynpoi ia kane ka jingpynbna sorkar sha ki nongkhaii bad mynta ka phah kynsan ban pyntip ia kane ka jingpynkylla ka sorkar ia u dewiong sha u mar ba lah ban ioh da kaba ia thied na niew na hat.
Da kane ka jingshim khajna sa ka central excise ki nongkhaii kila shah khniot sha ba palat, nalor ba ka sorkar jylla ka la pynkiew ia ka royalty na ka T.290 tyngka sha ka T.675 tyngka. Ia mynta la bthah ia baroh ki exporter ba ki dei ban leit buh kyrteng ia la de ha ka Customs bad Central Excise na ka bynta ban sinew ia katei ka khajna sha ka sorkar pdeng.
Ha kine ki snem baroh u dewiong u lait na ka excise duty namar ba la shim ba ia u la sei beit na khyndew ba leit ban die sha Bangladesh khlem da pynkhuid ia u ia kaba la tip da ka kyrteng ROM (Run-Of- Mine) na ka liang jong ki exporter ia mynta kim kwah ban ong ei ei namar kihap ban dang peit ia kane ka jingpynbna.
