Shillong Nailur 15 : Ha dien ba la kut ka pakhang surok miet kaba saw sngilynter, mynta ka sngi ki sengbhalang ki la pynbna paidbah ba kin iai bteng ia ka jingia khih ka jong kid a kaba khot ia ka pakhang ophis ha ka 17 bad 19 tarik mynta u bnai bad ka pakhang shnong kaba 24 kynta ha ka 20 tarik.
Ha ka 17 tarik ka pakhang surok miet kan sdang naduh ka por 7 baje mynmiet haduh san baje mynstep katba ha ka 19 tarik pat ka pakhang surok miet kan sdang naduh ka por 9 baje mynmiet bad kan kut ha ka por san baje mynstep.
Ki seng bhlang kim shym la khot ia kano kano ka jingiakhih ha ka 18 tarik mynta u bnai namar ha kane ka sngi ka dei ka sngi burom jong ki riew jong ka Balang Uniterain ia kaba la tip kum ka Uniterian day.
Ia kane ka jingiakhih la pynbna mynta ka sngi da u Vice President jong ka seng KSU u samla Fredrick Kharmawphlang ha ka kyrteng jong ki shiphew tylli ki seng, la ong ba ia kane ka rai la shim ha ka jingialang jong ki shiphew tylli ki seng.
Kine ki shiphew tylli ki seng ki kren shai ba ka jingiakhun ka jong ki ka long ban dawa na ka sorkar ba ka dei ban pyntrei kam ia ka ILP ha kane ka jylla Meghalaya ban iada ia ka jingwan rung kyrthep ki mynder ri.(SP News)
