Shillong, Nailur 13: Ka Khasi Student Union (KSU) Nongmensong Unit kala pynrem jur iaka jingwan ban khynra ki pulit iaki dkhot ka seng da kaba kynnoh ba ki dei kiba donkti ha ka kam pynhuri hura.
U Samla K Kharkongor Organising Secretary KSU Nongmensong ha ka kyrwoh ula ong, “Kane ka jingleh riewkhlaw ki pulit kiba leit khynra naphang iaki dkhot ka seng da kaba kynnoh ba ki donkti ha ka kam pynhuri hura ka long tangban pynthohbria lut iaki dkhot ka seng.”
Shuh shuh ula ong ba naka liang ka seng ka kyntu iaki paidbah ba kin iasnohktilang bad ba kin bat ruh iaka por khnang ba kin lait na kino kino ki riewshim kabu kumba la jia halor ka jingshahkem iaki arngut ki bar Jylla (Nepali) na Lumshyiap Nongmensong kaba ki thmu ban pynthud ika shong suk shong saiñ hapoh ka shnong. Ka seng ka maham tyngeh ia kiba kum kine ki jait riew bad lada ka lap na ka liang ka seng kan leh da kaba tyngeh.
Ha ka juh ka por u samla Kharkongor ula pynpaw ba ka seng ka buh ka jingkylli hakhmat ki bor ka aiñ ba aiu kin leh na ka bynta kine ki arngut ki bar Jylla kiba la shah bat ha ki pulit ka Nomngmensong ha ryngkat ki sakhi sabut kiba biang la ong ki dkhot ka KSU.(SP News)
