Mawlasnai, Jymmang 12: Ka jaidbynriew kan im kan neh ha kane ka sla pyrthei lada neh ka ktien ka thylliej bad lada neh ka kolshor bad kawei ka bynta ba donkam eh ban pyneh ia ka kolshor ka dei lyngba ka put ka rwai ka shad ka tem. Kum shibynta ban pynkhie im biang ka rukom shad kaba la sdang ban duh jait noh, ka Dorbar Hima Raid Nongtung ka la shim ia ka rai ban pynlong ia ka “Shad Lakhompong” ne bala ju khot ruh ka “Shad Rah Kynthei” ha ka Shnong Thadrang hapoh Mawhati konstituensi ha ka 23 tarik bad 24 tarik mynta u bnai.
Ka Dorbar Raid Nongtung ka la shim ia rai ban pynlong ia katei ka jingshad ha ka jingialang bala pynlong ha ka 26 tarik u bnai Iaiong mynta u snem bad ka la pynkha ia ka Raid Nongtung Arts & Culture Committee. La jied ia ki nongkitkam jong katei ka komiti kaba kynthup ia u chairman Bah Barnabas Lyngdoh, general secretary Bah Ioannis Makdoh arts & culture asset secy Bah John Lamarai, finance secy. Bah andreas Bina, Adviser Paiem Miwel Shadap (Syiem ka Raid Nongtung) bad ki members Bah B Sohtun, Bah Jim Lamar Bad Lobing Masharing.
Haba iakren bad u Bah A Bina uba long u assistant secretary ka Dorbar Hima Raid Nongtung u la iathuh ba ha katei ka dorbar ngi la rai ban pynlong ia ka Shad Lakhompong kaba dei ka shad tynrai mangi ka raid nongtung kaba ngi juh pynlong shisien ha shisnem ha kaba kum ki nongshong shnong jong ka rai ngi la shim bynta lut baroh. U la ong shuh shuh ba namar dei lyngba kane ka shad ba baroh ki riew rangbah, ki samla samhoi kumjuh ki kro ngi ia kynduh lang ha kawei ka jaka ban iashim bynta ha kane ha kane ka jingle niam kaba ngi ai nguh ba ia U Blei Nongbuh Nongthaw u ba la ri la kdup iangi baroh shi snem bad u la pynlait ia ka Raid na ki khlam kynsha kumjuh ruh ba un pyllait na ki jingeh ha shilynter ka snem kaba bud khamtam eh ka dei ka jingshad ka ba u Longshwa mynshaw u la jer bad ngi khot ruh ia ka kum ka Shad Rah Kynthei.
U Bah Bina u ong ia kane ka shad katkum u bala jer la sin da u longshwa u ni u kong ngi pdiang ia ka kumba ka long bad ia kane ka jingshad la pynlong da ki nongkhynraw kynthei bad shynrang U Syiem ki Basan khatar kur ki rangbah shnong ryngkat ka jingkyrshan lem u paidbah nongshong shnong hapoh ka Raid Nongtung. Bad la sdang biang ia kane ka shad naduh u snem 2007.
la iathuh shuh shuh ba ngi ju pynlong ia kane ka shad na kawei ka shnong sha kawei pat hapoh ka raid bad kano kano ka shnong bala pynbeit ban Shad Lakhompong katkum ka dustur hi kata ka shnong ka pynlong ia ka jingiarep nongkhynraw bad ia kane ka jingrep nongkhynraw la sdang naduh bnai kylla lyngkot ha kane ka nongbara ban Shad Lakhompong la khot ia khynraw niam bad ha kane ka khynraw niam don arngut ki heh khynraw arngut ki kynthei khynraw duh bad arngut ki phongkri kine ki pyniaid ia katei ka nongkhynraw niam kiba tam na kita la khot ia ki khynnah khynraw la ki shynrang ne kynthei.
Halor ka jingpynkhreh ia kane ka shad, u assistant secretary ka Dorbar Raid Nongtung, u la ong shwa ban shad Lakhompong ki khynraw ki shna ia ka tyngkong kron bad la jied artylli ki sngi kita katba lah dei ban pynlong beit ha sngi nongpluh lane ka sngi mukso ban kiew sha laban (Shillong) ban thied ki jingdonkam baroh na bynta ka shad Lakhomphong bad ka jingnshad pat la jied ba kan long beit ha ka sngi musiang ne mushai hynrei don pat ki snem ki bym lah ban kiar te ngi pynlong pat ha kano kano ka sngi tangba dei ban lait pat na ki bnai Lber, Iaiong ne Jymmang.
Ki jied ia ki nongshna diengrong, ar ki sakudih, ar ki ksing tem, 4 ngut ki dhuli arngut ki sawer ki skit shawiang ar ngut ki skit mahuri, u la bynrap.
U la iathuh ruh ba ka rukom shad ka long marsein mih ka mei sngi shad shwa ki khynnah bad kat nang kynrong ka sngi shad sa ki heh khynraw bad kynthei khynraw nangta pdengsngi bud sa ki paidbah baroh kynthei bad shynrang.
U Bah Bina u la ong ba ka jingshad la ju pynlong arsngi bad bun na ki shnong ba na jngai ki sahmiet naduh ka sngi shad nyngkong ha kato ka shnong ba ngat ka shad lakhompong haduh banda kut ka sngi shad kaba ar. U la iathuh ha ka sngi nyngkong la don ka jingun tiding un timun (kti ka diang ka kti ka mon) kut ka untiding untimun ha ka sngi kaba bud pat sa ka shad pyrdi ki kynthei ynda la sep ka sngi ka shad lakhompong ka lawai ka kur Rangngu ha khatduh ban pynwai ki paidbah kin leit phai lut shala ki iing ki shnong.
Balei khot pat ia ka kum ka Shad Rah Kynthei, U nongialam ka Raid Nongtung u la iathuh namar ha katei ka jingshad ki kmie ki kpa jong ki iing kiba bala ia juh iajan bad kiba sngewbit iala ki khun ban pynpoi kha bad kawei pat ka iing kaba ia tip ia mon dei ha katei ka shad kein kin ialam ia ki khun hadien ka jingriam pynkup iala ki khun shynrang ne kynthei haduh bynda I phuh bad ha katei ka shad kin ialam pynithuh iala ki khun kynthei katba dang shad u shynrang bad lada kano kano ka khynraw kynthei kaba kohnguh ban ia shadlang bad uno uno u shynrang bala pynithuh kamut kitei ki shijur ki dei kiba la iamon bad iapoi sha ka jingpoi kha poi man, u la bynrap.
U la iathuh ba ha Raid Nongtung katkum ka dustur don ka Shad Nangkoi kaba pynlong da ka kur hynrei kane ka shad kala duh ym juh pynlong shuh bad ka shad wait bad ka shad mastih kaba juh shad mynba jop thma bad ki synteng bad kaba juh shad ruh ha ka port hung syiem hynrei ka shad kaba heh tam dei ka shad Lakhompong.(SP News)
