Shillong, K’Lyngkot 11: Ka Synjuk 20 Shnong ba kynthup ia ka Pdeng-shakhap, Thangbuli, Um-lakhur, Suchen, Bataw, Iapmala bad kiwei kiwei ki la rai ban pynlong ia ka pakhang ophis ba khlem-pud jong ka MeECL kaba don ha Leishka ha Pdengshakhap, West Jaintia Hills District na-duh ka 14 tarik mynta u bnai halor ka jingpyn-khein jong ka ia ki kular bad ka synjuk ka la dawa.
Ia kane ka rai la shim ha ka jingialang jong ka synjuk kaba la long hynne ka sngi Thohdieng.
Haba kren bad u Bah Paul Pakyntien, President ka 20 Shnong Association ula ong ba ka symjuk ka la shim ia kane ka sien jam ban pynlong ia ka pakhang ophis jong ka Meghalaya Electricity Corparation Limited (MeECL) kaba don ha Leishka, ka long namar ba ki bor ka MeECL kim shym la pyndep ia ki kular jongka ban thung-kam ia ki Casual Labour ha katei ka ophis treikam kiba don kumba 20 ngut bad ka jingbym lah jongka ban siew dep ia ka bai lutksan sha ki trai jaka mynta la bun bun snem.
U la ong na ka liang ka synjuk la la ai da ka dorkhas ia ka MeECL ban pyndep ia kitei ki jingdawa hapoh ka 19 tarik u Nongprah 2012, hynrei ka la shu kular kai ban pynbieij ia ki paidbah ban iai ap na ka por sha ka por bad haduh mynta kam shym la pyntreikam ia kitei ki jingdawa ba la buh da ka synjuk.
“Nga kyntu ia ki paidbah ban ia snohkti lang bad ka synjuk ha kane ka prokram iakhih na bynta ka jingmyntoi ka thain,” la ong u Bah Pakyntein bad ula bynrap ba ki nongtrei jong ka MeECL ruh ki dei ban iatreilang halor kane ka jingiakhih khnang ba kan long kaba jop.
U la ong ba katei ka pakhang ophis MeECL ha Leishka ka ban sdang naduh ka 14 tarik mynta u bnai kan iaibteng tad haduh ba ka MeECL kan pyntreikam ia kitei ki jingdawa baroh.
Haba iakren bad u bah Elias Lyngdoh uba long u Chief Engineer (Civil) ba ka daw ka jingbym lah ban siew ia ka bai lut ksan ka dei eh ba ka don ka jingiakam trai da bun ngut ia ki jaka bad ia mynta ula ong ba yn pat tohkit da ka PIL khnang ban ioh pynbeit noh phar ia baroh ki jingkam trai ia ki jaka. Ula iathuh ba dei tang kawei ka jaka ba dang ioh ban siew bad ia kane yn lah ban pyndep ha kane ka taiew.
Halor ka jingthung kam pat ula iathuh ba ka kynhun kaba kwah ba iakynduh ia ki heh sorkar ban iakren hynrei kim shym la ioh lad namar ym shym la niew briew bad ka lah ban long da kane ka jingsngew shah ibein kala pynlong ia ki ban khot da ka pakhang ophis.
