Nongstoin Iaiong 21: Ka Lyngam Indigenous Federation (LIF), ka North East Slow Food and Agrobiodiversity Society (NESFAS) ryngkat ka jingkyrshan jong ka Shahlang Area Local Labour Association (SALLA) ki la ia trei lang bad ki shnong jong ka Khatarshnong ban pynlong ia ka Lyngam Mei-Ramew Food Festival kaba nyngkong eh ka ban long ha ka 24th mynta u bnai.Ka jaka ban pynlong ka dei ha Umdang (Riangiong).
Kane ka tamasa jong ki jingbamtynrai, ki kolshor bad ka jingpyninam ia ka rukom shet rukom tiew kan long ha ka nongrim ka bakhuid, babang bad ka balehhok (Good, Clean and Fair). Kane ka tamasa ka long ban punshlur bad ban kyntiew ia ka jingpynmih bad ka jingiadie ia thied ia ki jingbam tynrai kiba khlem dawai. Ka don ka jingiohi jngai na ka ling ka NESFAS bad ka LIF ba ki tamasa kiba kum kine kin pynkhie im ia ka rukong rep-rukom riang tynrai ha kaba ki laiphew jait-laitphew sker ki jingthung jingtep kin iai im iai sah na ka wei ka por sha ka wei pat.
Kane ka tamasa jingbam tynrai, kadei jingpyni ia ki sap shet, ka jingpyni symbai bad iaki kolshor, ym tangba kan wan rah biang ia ka jingsngew sarong ia la ki jong hapdeng ki jingrep bad ki nongbam, hynrei kan ai lad ruh ia ki nong shong shnong jong ka thain Lyngam ban pyninam ia ka jingriewspah jong ka Mei-Mariang lyngba ka bam ka dih, ki jingshad ryngkat ka pud ka tem.
Ka jingpynkhring ba kham kyrpang jong ka ne ka tamasa ka long ka jingiakop shet kum ka lad ban pynshlur ia ki briew ban wan shakhmat, bad ban pyninam ia ki buit shet bad ki jait jingbam tynrai. Ki nong iashim bynta ki dei ban pyrshang ban lap thymmai ia ka rukom shet ia u krai, kumjuh ruh ia ki wei pat ki jingbam tynrai jong ka thain (innovative cooking and developing new recipes). Ia ka jingbishar ia ka jingiakop shet yn pynshongdor da ki kyndon jong ka jingbang, ka jinglap thymmai ha ka rukom shet bad ka rukom pyninam (taste, innovation and Presentation). ki nongjop kin ioh Rs. 10000, Rs. 5000 bad Rs. 3000 (1st, 2nd bad 3rd prize). Kan don ruh ha kato ka sngi ki jingshad tynrai bad ka pud ka tem tynrai da ki briew jong ngi hi jong ka thain Lyngam.
Ka jingiashim bynta jong phi kan wanrah ia ka ne ka tamasa ha tei ka sngi ka bajop. Ngi khot sngewbha ia phi ban ia wan shim bynta lem bad ban pynshlur ia ki nong shongshong jong ka thain Lyngam, khamtam eh ki trai shnong jong ka khatarshnong (ngin nang pynkiew ia ki KFC; Khasi Fine Cuisine). kito kiba kwah jingtip shuh-shuh shaphang ka jingiakop shet (cooking competition) kin sngewbha ban phun sha kine ki number: 9615172968/ 8014337676.(SP News)
