Shillong, Naiwieng 01: Hadien ba ki bar jylla hapoh ka lama jong ka the Meghalaya Gorkha Ex Servicemen Welfare Association kila kyntu ia ka sorkar jylla ban thaw ia ka Non-Tribal Security bad Welfare Board ha ka jylla bad ban thung ruh ia ki Rangbah Shnong ha ki 3 tylli ki General Assembly Constituency kiba hap hapoh East Khasi Hills, na ka liang u Vice President ka KSU Seng Kmie u samla Fredrick Kharmawphlang ula pynpaw ba ka sorkar kam dei ban pushe (Entertain) ia kane ka jingdawa ki bar jylla namar ba ki bar jylla kim dei ban leh trai ne synshar ha kane ka bri u Hynniewtrep.
U Fredrick Kharmawphlang ula ong ruh ba ka sorkar da lei lei kam dei ban pdiang ia kane ka jingdawa jong ka Meghalaya Gorkha Ex Servicemen Welfare Association bad ula ong ruh ba kine ki lah ban shong ban sah hangne hynrei kim dei pat ban knieh ne ban pyni bor ia u trai ri trai muluk kane ka jylla,
Lada ki shong hapoh Municipal Area ne ha kino kino ki jaka kim lah ban kam ba dei ban pan iala u jong u Rangbah Shnong ban ithuh da ka sorkar nga sngew ba kane ka jingleh kine ki bar jylla kadei tang ban iuhkhlieh bad iuhroit ia ka hok longtrai ka jaidbynriew jong ngi”
Kum ka jaidbynriew da lei lei ngin nym ailad ba kine ki bar jylla kin sdang ban knieh ia ka synshar ka khaddar bad ban iuhroit ne pynibor khamtam ha ka riti synshar ka jong ngi la kadei ha kano kano ka bynta ruh ngi dei ki Khasi ngim tuklar ia ka jingwan shong ka jong ki hynrei kim dei pat ban dawa ba ma ki kin don la ka jong ka synshar khaddar kidei tang ki nongwanshong kim lah ban long kum ki trai.
Ka sorkar kam dei ban pushe bad kim don ruh ia katta ka hok ban synshar ha kane ka bri u hynniewtrep bad ka sorkar kam dei ban ithuh ia u headman ne Rangbah shnong uba kin thung namar ba u Rangbah Shnong udei ban dei hi u Khasi namar ba ka Dorbar Khasi kadei ka Dorbar Blei bad ngim kwah ba kine ki bar jylla kin pynjaboh ia ka rukom synshar khaddar kaba khuid kaba suba ha kane ka bri u hynniewtrep.
Hapoh u pud u sam jong ka ri Khasi hi ngim kwah ba ki bar jylla kin don iala ka jong ka Dorbar namar ka dorbar baroh kaban don ha kane ka Bri kadei ban dei beit jong u Khasi bad ka sorkar kam dei ban pushe ne ithuh lano lano ruh ia ka dorbar jong ki bar jylla kumba kila pan.
Ngi kyntu ia baroh ki dorbar shnong ba kim dei ban ailad ba kane ka jingdawa ka jong kine ki bar jylla kan urlong namar ba kadei shi bynta ka jongki ban pynibor bad thombor ia ka hok jong ki trai ri trai muluk bad ia ki dorbar ha ki Hima Khasi baroh kawei.ngi dei ban long kiba husiar namar lada ngi lah kdup ia u bsein hynrei haba kut hi u bsein un sap uh kylla bad kadei ka kamram ka jong ngi ki nongshong shnong ha ka bri u hynniewtrep ba ngin long kiba husiar nangne shakhmat bad ka jingmih shakhmat kine ki bar jylla ka long ban pyn iala ka jong ka bor ha kane ka bri u hynniewtrep bad ha ka jylla hi baroh kawei bad dei ha kum kine ki dak ki shin ba ki sengbhalang ki ieng hala ka nongrim ba ka sorkar kadei ban pyntreikam noh ia ka ILP bad kam dei ban iai kuman hynrei kadei ban shim noh ia ka rai kum ka jingkitkhlieh bad ka sorkar kam dei ban lehkamkai ne ialeh iarieh hangne hangtai.
Lada a sorkar ka don ia ka mon ban pyntreikam kam don jingeh hynrei ka jingiai kuman ka sorkar Congress kadei shi bynta na ka jingtieng ioh ka duh iala ka jong ka Vote Bank, ki nongmihkhmat kiba don ha ka seng congress kiba dei ki trai jylla nangne na ri lum Khasi bad rilum Garo kum ki nongmihkhmat kidei ban buh shwa hakhmat ia ka jaidbynriew ha kum kane ka saw ka sian bad lada kim shim ia ka jingkitkhlieh kan shah tyllep ha ka jingshah synshar ha ki bar jylla kum ha ka jylla Tripura bad lada kane ruh ka jia ha kane ka jylla kine ki nongmhkhmat kidei ban shim ia ka jingkitkhlieh. (SP News)
