Shillong, Risaw 31: Mynta ka sngi u Lamphang ka iing dorbar thawain ka jylla u Thomas A Sangma bad u Commissioner Secretary u Dr. Andrew Simos, u Secretary u Malthus Sangma bad ki ophisar kila leit ban jurip ia ka jingtei ia ka iing dorbar thawain ka jylla kaba dang shna mynta ha Mawdiangdiang.
Ka jingleit jurip ia kane ka iing dorbar thawain ka jylla kaba dang shna mynta ka long ban peit ba ka jingtrei kan long kaba iaid beit bad iaid ryntih bad kan long kaba shngian ka jingshna ia ka bad kum juh ia ki nongtrei kiba dang trei mynta.
Ha dien ka jingjurip la don ruh ka jingialang bad ki tnad sorkar kiba dei peit ia kane ka jingtrei khamtam ka tnad PWD ba dei peit ia ki iing ki sem namar ka jingpynieng ia ka jingtrei kaba da ki Steel kala sdang mynta ha kaba u la ong ha ka jingialang ba dei peit but ryntih ia ki kyndon.
U Lamphang ka iing dorbar u la kren shai ban peit ba kan don ka jingshiang ia ka iing bad kum juh ia ki nongtrei, la ong ba ka jingtrei kala iaid beit bad khmih lynti ban pyndep ia ka iing dorbar ha ka por bala buh watla ka slem da shibnai.
U Lamphang ka iing dorbar la ong ba ia ka jingshna dei ban pyndep ha bnai Naiwieng ban wan namar ka jingtrei kala iaid 90% ia ka bynta kaba sha kamon, katba ia ka bynta kaba sha kdiang ka ba don ka ophis u myntri rangbah ka jylla jong u Lamphang, Assembly Secretariat bad Library la jan dep.
Na ka liang jong ki Kontraktor bad ka PMC kila kular ban pyndep ia ka jingshna ia ka dome hapoh 45 sngi bad kane kan pynlong bala lah ban pyndep ia ka jingtei ia ka iing dorbar baroh kawei.
