Shillong, Nohprah :Ka long ka jingkmen ia ki paidbah ka Mairan
g Konstitwensi bad khamtam ia ka Mairang Vidyajyoti Inclusive School ka KJP Synod Sepngi, ha kaba u MLA ka thain bah Metbah Lyngdoh u la pyllait paidbah ia ka Ambulance lyngba ka shkim SRWP 2013-14, katba ia ka bus u la noh synniang sngewbha da lade shimet ia ka Vidyajyoti skul kiba long kum ki jingai sngewbha Khristmas ia ki paidbah Mairang.
Ia ka kali kit nongpang kaba u la noh synniang na ka MLA shkim, la ai ti sha ka FOCUS ban pyniaid na bynta ban shakri ia ki nongpang bad shitom ka thain Mariang.
Kaba sngewtynnad eh ka long ba une u MLA nalor ki skim ba u iarap ia ki shnong bad ki paidbah ula noh synniang sngewbha da ka mynsiem ba kylluid kum ka jingai sngewbha Khristmas ia ka skul Vidyajyoti ha Mairang.
Ia kitei ki kali u la pyllait paidbah ha ka tamasa tlang ba la pynlong da ka FOCUS hynne ka sngi Thohdieng ha KSA Stadium, Mairang ryngkat ka jingdonlang u Paiem PM Syiemlieh, Syiem Hima Nongkhlaw kum u symbud kongsan, u Pastor WC Kongwir, Kong Inoris Rani bad kiwei ki riew rangbah.
U bah Metbah ryngkat ba ka Kurim ki la noh synniang ia katei ka bus kum ka jingkynmaw ieit ia u (L) Brancis Nongrum bad I (L) Torial Rani na Manai kiba la trei shitom ban iarap ia ki paidbah ha katei ka thain.
Ha kane ka sngi la pynkup buro ruh ia ki 7 ngut ki khynnah kiba wan shakhmat ha matrik kynthup ar ngut ha ka klas XI ha ka exam 2013.
U la ong, ba ka jingpynlong ia ka tamasa tlang (Winter Festival) ba la pynlong hynne ka sngi ha KSA Stadiun ka long na bynta ban pynneh ia ki riti ki dustur kiba u longshwa mynshwa u la buh.
Kane ka tamasa watla hapdeng ka jingkhriat ki paidbah ki la wan ba sakhi ia ki jingialehkai, kynthup ka phutbol, iakop shad, siat khnam, rwai, tem bad kiwei kiwei.(SP News)
