Shillong, Risaw, 14: Mynta ka sngi, u Myntri Rangbah ka jylla Meghalaya, u Conrad K. Sangma u la kren shaphang ka jingkular jong ka sorkar jylla ha kaban jingpynlut biang iaka pisa ba ioh na ka jingtih ia u marpoh khyndew ban khnang ban pynioh iaka lad kamai kajih kaba neh, ka jingpyniar iaka imlang ka sahlang bad ki kam ba iadei bad ka jingpyn ioh pisa lyngba ka District Mineral Foundation (DMF).
Haba kren ha katei ka prokram, kaba ha kajuh ka por la rakhe iaka jingdap 10 snem jong ka District Mineral Foundation ha State Convention Centre, Shillong, ha kaba u Conrad u la ong ba katba ka kam tih iaki marpoh khyndew ka dang bteng ban long u rishot uba donkam tam na ka bynta ka ioh ka kot ka jylla, hynrei ka jingthmu bakhraw jong ka sorkar ka long ban pyndonkam iaka pisa ba mih na kane ka tnat sector ban tei iaka ioh ka kot kaba neh bad kaba lah ban pynthymmai biang.
Ha ki 10 snem ba la dep, ka District Mineral Foundation kala dep pyntreikam iaka T. 181 klur ha Meghalaya, lem bad ki 923 tylli ki projek ba la wanrah ha kylleng ka jylla, kaba na kine 542 tylli la pyndep.
Katba iaka pisa ba ioh la dep pyndonkam na ka bynta bun ki bynta jong ki kam pynroi, kynthup iaka jingtei iaki kamra ha skul, jingpynbiang iaki jaja ai jingsumar, ki projek na ka bynta ban pynioh um bam um dih, ka jingpynioh iaki jynkieng ha ki shnong nongkyndong bad ki kam ba iadei bad ka jingpyn biang iaka mariang, kum ka jingpyn lang um ha ki dam bad ka jingthung dieng ha ki jaka tih maw.
Ha ka jingkren shaphang ka jingdonkam ban jam shabar naki rukom pynroi pynsan iaki madan kham mynshuwa, u Myntri Rangbah u la ong ba iaki tiar jong ka DMF dei ban ai sha ki projek kiba wad ne pynmih ki lad ioh kam ioh jam kiba iaineh bad kiba pynmyntoi iaki shnong ki thaw, khamtam eh ha ki jaka ba shah ktah ha ka jied marpoh khyndew.
U la kren ruh shaphang ki katto katne ki lad ba la shimkhia da ki distrik, kynthup iaka jingpynroi iaki jaka jingleitkai ba pynneh pynsah iaka mariang bad ka kynhun pynmih iaki mar ba kham rem dor na u ngap ha Nengmandalgre, ka rep niangrandia ka jaka thain jain ha Ri Bhoi bad ka iew pynkhraw jong ka district ban kyntiew iaki mar ba pynmih da ki nongshong shnong.
U la ong ruh ba ka kam tih iaki marpoh khyndew ka long kaba donkam na ka bynta ka ioh ka kot. Hynrei ka long kaba donkam na ka bynta ka jylla ba kan lah ban bei tyngka biang bad iaka pisa kaba ioh, ha kiba bun rukom kum ka DMF bad kiwei kiwei, kano kano ka pisa kaba ngi ioh, ngin pynlut biang iaka ha ka rukom ban nang pynioh iaka ioh ka kot sha ka thong kaba kham bha bad kaba neh barabor.
U Conrad u la batai shai ruh shaphang ka Meghalayan Age Pavilion, kaba la dep pynlong ha kane ka nongbah Shillong ha ka sngi ba ar, kaba long kum ka nuksa jong ka jingiohi jngai jong ka sorkar ha kaban kyntiew iaki kam khaii pateng ha la ka shnong bad kaba pynieng iaki mar rep jong ka jylla Meghalaya.
U la ong ba ka kompany Pavilion ka pyni ia bun ki bynta jong ka jingthain jain na shnong, ki nongpyn mih iaki wine na ki soh, ki nongshna ice cream bad kiwei kiwei ki nongseng kam lajong, lem bad kiwei ki mar bam ba la ioh bad pynmih na ka jylla Meghalaya.
U la ai khublei ruh iaka East Jaintia Hills bad kiwei kiwei ki distrik na ka bynta ka jingsdang jong ki iaki kam bapher bapher bad kyrpad ia baroh ki Deputy Commissioners ba kin pyndep ha ka por iaki projek bad pyndonkam pura iaka pisa.
