Shillong, Risaw, 14: U Myntri Rangbah ka jylla Meghalaya, u Conrad K Sangma, mynta ka sngi u la dep pyllait iaka bynta ba ar bad ba khatduh jong ka jingsiew ba dei jong ka Umbrella Post-Matric Scholarship na ka bynta jong ki samla pule kiba dei ki Scheduled Tribe (ST) na ka bynta u snem pule 2025 haduh 26 ha ka prokram ba la long ha St Anthony’s College, Shillong.
Katba ka PG Block Biotechnology Department & Bio-Informatics Lab, kala dep pynbha pat iaki kabu bad ki jingdonkam hapoh ka phyllaw jong ka college bad ki tiar kiba la ioh lada thied lyngba ka RUSA 2.0 bad ka Computer Lab hapoh ka Chief Minister’s Skills Mission, la plie pyrda da u Myntri Rangbah ha ka jingiadon lang u Myntri ka pule puthi, u bah Lahkhmen Rymbui, u Commissioner & Secretary ka pule puthi, u Vijay Mantri bad kiwei kiwei ki riewpaw khmat.
U Myntri Rangbah, u Conrad K Sangma, u la ong ba kawei na ki mat ba kongsan jong ki samla pule ka dei shaphang ka scholarship, ha kaba u la ong ba u la sngew kmen ban pyllait noh iaka scholarship na ka bynta u snem pule 2025-26 bad u la lah ban pyn urlong ia baroh ki jingkhmih lynti bad pyndep iaki jingdonkam bad jingthrang baroh. U la ong ruh ba ka rukom pyn kynriah pisa lyngba ka DBT ruh kala sdang mynta.
U la pyntip ruh ba ki katto katne ki jingsiew ba dang sah ban siew sha ki nongioh jingmyntoi ba la bit la biang, yn sa pyndep namar ba ka Aadhaar jong ki ym pat pyniasoh lane iadon bynta bad ki bank account jong ki, lane namar ba ym ioh jingtip na ka Public Financial Management System ba lehse dang sah pisa.
Ka jingai jingmut halor ka synshar khadar bad ka pule dangle, u Conrad u la ong ha ki samla pule kiba la ialum lang ha ka jingialang ha St Anthony’s College bad kiwei kiwei ki skul bah ba hajan ba ki samla pule ki dei kiba kongsan na ka bynta ka sorkar bad ki dei ha ka pdeng jong ka jingshim rai jong ka sorkar bad u la batai shai ba kumno ki polisi bad ki rai, la leh da ka sorkar da kaba buh jingkynmaw iaka jingbha jingmiat jong ki samla pule bad ki samla ka jylla.
U la phah kyrpang da ka khubor sha ki samla pule da kaba kyrpad ia kiba ioh iaka scholarship ba kin pyndonkam bha iaka pisa ba ki ioh khnang ba kan pyn myntoi iaki hadien ha bud na ka bynta ka jingpule jong ki.
Na ka bynta jong u snem 2025–26, la don 96,801 ngut ki nongioh jingmyntoi kiba la bit la biang ban ioh iaka scholarship kaba hap hapoh ki skhim jong kine, kynthup ia 88,061 ngut ki samla pule lane or 91 persen kiba la dep ioh iaka scholarship ba pura ka jong ki. Ki don 52,839 ngut kiba aplai iaka scholarship bad 35,222 ngut ki samla pule kiba pynthymmai ban ioh scholarship.
Ka sorkar pdeng bad sorkar jylla kala dep pyllait T. 198.43 klur na ka bynta ka skhim jong u snem 2025–26, ha ki ar bynta jong ka jingsiew. Katba ka jingsiew ba nyngkong ka long T. 93.95 klur kaba dei T. 84.55 klur na ka sorkar pdeng bad T. 9.40 klur na ka sorkar jylla.
La pynsngeh iaka bynta na ka bhah jong ka sorkar pdeng, la mang noh mardor bad iaka bynta jong ka jylla. Iaka jingsiew ba nyngkong jong ka T. 104.48 klur, ka dei T. 94.03 klur na ka shlem pdeng bad T. 10.45 klur na ka shlem jylla.
Katba baroh kiba ioh iaka scholarship ha ka bynta ba ar bad ba khatduh jong ka Umbrella Post Matric Scholarship ka long 96801 ngut. Ha katei ka jingialang, la don ruh u Myntri ka kolshor bad riti dustur, AH & Vety, u bah Sanbor Shullai, Fr Arcadius Puwein, ba dei Principal jong ka St Anthony’s College bad kiwei kiwei.
