Shillong, Risaw 14: Ka Executive Member ka Kong Deiti H. Majaw haba jubab ia ka jingkylli ba la wanrah da u bah Titosstarwell Chyne u la ong ba ka EC kala pyntreikam ia ka Khasi Hills Autonomous District Council Social Custom of Lineage Act,1997 kumjuh ia ka Rule jong u snem 2007.
Haba jubab ia ka jingkylli bynrap kiba la buh da u nongialam ka liang pyrshah ha iing dorbar ka KHADC u la ong ba ia ka Tribunal ym pat lah ban thaw namar kan kthah ia ka pla pisa ia mynta ban pyniaid beit iaid ryntih ia kane ka ain la buh ia ka registrar ban peit bad haduh mynta kam shym don kano kano ka jingthut ka kam ka dang iaid beit.
Haba jubab ia ka jingkylli ba la buh da ka kong Rona Khyndeit MDC, ka Nongpoh haba iadei bad ka Shawbhoi bad Ringbia ka EM kala ong ba ia mynta kim pat pynkylla ka dang neh hi kumjuh namar ki dang wad ia ki riew shemphang ki ban batai shai ia ka Ringbia bad ka Shawbhoi.
Ha kawei pat ka jingkylli ba la buh da u nongialam ka liang pyrshah u bah Winston Tony Lyngdoh u la ong ba ka jingpyntreikam ia ka Biometric Attendance ka dang sdang ha ka 1/Nailur/2026 bad ka por ba kin poi ki nongtrei ha ki jaka trei ha ka por Lyiur ki dei ban poi shwa ka 10:30 mynstep bad 5:00 baje janmiet ba kin mih bad ha ka por Tlang 10:30 mynstep bad 4:30 janmiet.
Ia mynta la buh saw tylli ki Biometric Attendance kawei ha iing bishar, kawei ka Legislative bad ar ha Executive ka dor jong kine ki saw tylli ki mashin ka long T.3,59,829/-tyngka bad haba la khein ia ka bai trei kala kot sha ka T. 4,59,854/- tyngka bad ka jingpyndonkam ia kine ki kor ka dang long dang shi bnai tam eiei mynta.
