Shillong, Kyllalyngkot 10: Ha ka jingialang kaba la long mynta ka sngi ha Lok Bhavan, la pynbam smai ia ka 
Mohite Dere kum ka Chief Justice jong ka Meghalaya High Court. Ïa ka jingbam smai la pyniaid da u Lat ka jylla Meghalaya u C.H Vijayashankar.
Ha kane ka sngi la iadonlang ki dkhot jong ka Kynhun Myntri Sorkar Jylla, ki heh ophisar jong ka Sorkar Meghalaya bad ki kynrem ki lyndan kiba trei ha ki kam ba iadei bad ka ain.
Ia ka jingthung kam la leh da ka President ka Ri India ka Droupadi Murmu, ha ka 1 tarik Kyllalyngkot, 2026. Ia ka hukum thung kam la pynmih da kaba pyndonkam ia ka bor ba la ai hapoh ka Article 217 jong ka Riti Synshar ka ri India. Kane ka jia ha ka por ba ka India ka rakhe ia ka jingdap 76 snem ka jingioh jinglaitluid, kaba pyni ia ka jingiai kut jingmut ban pynkhlain ia ki kam ain jong ka ri bad ka jingtreikam ka ain.
Ka Justice Mohite Dere, kaba long mynshwa ka senior judge jong ka Bombay High Court, ka la wan bujli ha ka jaka jong u Justice Soumen Sen, u ban shimti mynta kum u Chief Justice jong ka Kerala High Court.
Ha kane ka sngi, ka Justice Mohite Dere ka la bam smai, da kaba pynskhem ia ka jingngeit bad jingbud jong ka ia ka Riti Synshar ka ri India. Ka la kular ban pynthikna ia ka jinglong trai bad ka jingiatylli jong ka India bad ban pyndep ia ki kam jong ka khlem kano kano ka jingsheptieng ne ka jingleh shiliang.
Ka prokram ka la kut da ka jingai u Lat ka Jylla ia ka jingthoh ba la soi da ka Chief Justice ba dang shu shimti ia ka kam, kaba long ka dak jong ka jingsdang ka jingtrei jong ka.
