Shillong, Rymphng 05: Mynta ka sngi 5.02.2026 u nongai buid ba rangbah ka seng samla pule ka Jaintia Students union seng kmie u bah Dapmain Suchiang, u la ia kynduh ia u myntri ba dei peit ia ka tnad pynneh pynsah riti dustur u bah Sanbor Shullai ban kyntu ia ka sorkar ban tei ia ka dur mot u Kiang Nangbah ha Jowai pyrshah ka Kiang Nangbah College.
Ha kane ka jingiakren bad u myntri ba dei peit ia ka tnad pynneh pynsah riti dustur la ong ba ka sorkar kan iaid sha khmat ban tei I u mot sah nam u khlawait ka ri lum Jaintia u Kiang Nangbah bad la kular bay n pyntrei noh ia kane ka kam mynta u snem hi.
Ban pynkynmaw ba bun snem mynshuwa ka sorkar kala dep ban phah shna ia ka dur mot jong u Kiang Nangbah ba la buh kai mynta ha khmat ka ophis jong ka tnad pynneh pynsah riti dustur ha State Central Library kaba khlem lah ban pynieng bad mynta halor kane ka jingdawa ka seng u myntri u la klur ban pynieng noh mynta u snem.
