Shillong, Nailur 22: U Myntri Rangbah ka Jylla Conrad K Sangma ha ka sngi Nyngkong u la leit sha Phulbari bad Rajabala Konstitwensi ka West Garo Hills, bad iakynduh markhmat ia ki paidbah ha ki shnong jong ki.
Ha kane ka jingleit u la ia kren bad ki paidbah nongshnong shnong ha shnong, Rongadatgre, Chandigre, Chibinang, Shyamnagar bad Bhaitbari, bad sngap dala ki jong ki skhor ia ki jingeh ba ki iakynduh, ha kane ka jingleit la synran lang da u MLA ka Phulbari Abu Taher Mandal bad u MLA ka Selsella Arbinstone Marak.
Kane ka jingleit ka long kongsan bha naba ka dei shibynta na ka jingpyrshang jong u Myntri Rangbah ban leit iuhjat ha kylleng ki jaka ka Jylla bad ban iakynduh markhmat ia u paidbah, khamtam ha ki jaka nongkyndong bad kiba kyndong bha.
Da ka jingiakynduh ia ki nongshong shnong hala ki jong ki shnong, ka Sorkar ka kwah ban pynthikna ba ia ki jingdonkam jong ki paidbah ha man ki shnong dei ban sngewthuh da ki bor kiba halor khlem da iaid lyngba kiwei.
Ha Rongadatgre, ki paidbah na kylleng ki jaka jong ka Demdema C&RD Block bad Batabari C&RD Block kila ialum khrui ban iakynduh ia u Myntri Rangbah. Ki Nongtrei jong ka kynhun CM-Connect kila iadonlang ban buh jingthoh ia ki jingeh bala pynsngew da ki nongshongshnong, khnang ba yn lah ban buddien ia ki.
Haba kren ha ka jingialang, u Myntri Rangbah ula ong ba ka jingthmu jong kane ka jingleit ka jong u ka long ban sngap ia ka jingeh jong u paidbah dalade, ka dei ka jingpyrshang jong ka Sorkar ban poi sha man ki kyndong kynshrot jong ka Jylla.
U Myntri rangbah u la ong ba u la leit iuhkjat ha kylleng ki jaka jong ka Jylla ban sngewthuh ia ka jingeh u paidbah dalade. Ka jingleit jong u ka long shibynta na kane ka kam, ha kaba u la iakren bad ki paidbah bad ban sngap ia ki jingeh jong ki bad ban ai ia ki jingbthah kiba donkam ba dei ban leh.
Haba kubur ba don bun ki mat ba la pynsngew, ula ong ba ym baroh lah ban pynbeit shisien pynbeit, hynrei ka Sorkar kan pyrshang katba lah ban pynbeit ia ki jingeh jong u paidbah.
Kum ka Sorkar, ki sngap bad wanrah ia ki lad ki lynti ka ban iarap ia ki briew ba kin kiew, u kwah ban pynthikna ba ki briew jong ka Jylla kin ioh ia ka kabu ban pynsngew ia ki jingeh jong ki hakhmat u Myntri Rangbah, ia ka jingkren jong ki paidbah la buh jingthoh, u la ong.
Ha Iew Chibinang, ki nongshong shnong kila aiti ia ka dorkhas, kaba pynpaw hakhmat eh ia ka jingsngewkhia halor ka surok bad ki lad pyniasoh. Haba jubab ia kine ki jingdawa bala slem bha, u Myntri Rangbah u pyntip ha ka jingialang baka Sorkar kala dep aiti ia ka work order ban pynbeit ia ka jingeh haba iadei bad ka jingpyniasoh surok ha ki jaka them jong ka West Garo Hills khamtam ha Phulbari, Rajabala bad New Bhaitbari.
Ha kane ka jingleit iuhkjat, u Myntri Rangbah ula leit jurip ruh ia ka jingpyntrei ia ka stadium ba dang iaid mynta ha Shyamnagar. Kane ka project ka long shibynta na ka jingkyntur ka Sorkar ban tei ia ki jingtei kiba lah ban sei ia ka sap jong ki samla ka thain.
Ka jingleit iuhkjat sha Phulbari bad Rajabala ka pyni ia ka thong ba kham heh jong ka Sorkar haba iadei bad ka roi ka par kaba kynthup lang ia baroh, ha kaba ka synshar khadar kan ym kut tang ha nongbah hynrei ka poi sha man ki shnong.
