Shillong, Nailur 22: Ka iing kashari baheh duh jong ka jylla Meghalaya, ha ka jingiatreilang bad ka ophis jong u Commissioner na ka bynta kiba duna dkhot met, Meghalaya, Vidhi Centre for Legal Policy bad Mission Accessibility, New Delhi, kila pynlong iaka prokram halor ka jingshah ban ioh jingbit ban mih ban rung hapoh ko ophis sorkar hapoh ka ain Rights of Persons with Disabilities (RPwD) Act, 2016, ha ka jingioh ka hukum na ka Supreme Court of India, ha ka High Court Auditorium ha ka sngi ba ar.
Ha katei ka prokram, ka Chief Justice ka iing kashari baheh jong ka Meghalaya, ka Justice Revati Mohite Dere, kala ong ka ain RPwD ka dei kaba la buh ban iada iaka hok bad ka burom jong ki briew ba duna dkhot met, iada na ka jingshah peit shiliang khmat, pyn thikna ban ioh kajuh ka lad bad ban pynbiang ne seng ki lad ki lynti ba ka jingpyntreikam bad ka jingpynbor ban pyndep iaki hok jong ki kan long kaba biang.
Ka Justice Dere kala peitngor bha watla don bun tylli ki rai jong ka Supreme Court, hynrei ki briew ba don jingduna ha ka dkhot met kila iai bteng ban shem jingeh ha ryngkat ki jingduna ha ka jingpyntreikam iaka ain bad ki jingbthah jong ka iingbishar kiba nang iai long ka jingsngewkhia bakhraw. Kala ong ba kum kine ki jingjia ka long namar ka jingbymtip bad ka jingbymsngewthuh iaki jingeh ba ki briew ba duna dkhot met ki iakynduh, ryngkat bad kiwei de ki daw.
Kala ban jur da kaba ong ba ki briew kiba don jingduna ha ki dkhot met jong ki, ki donkam ka jing laitluid, burom bad ka burom ka long rynieng jong ki ym dei tang ban don jingisynei. Kala ong ba ha ka jaka ban pynshlur iaki ba kin long kiba laitluid bad shaniah ha lade, hynrei ki briew ki pyrshang ban kah lynti iaki da kaba peit shiliang khmat iaki jingdonkam bad ka hok jong ki.
Ka Justice Dere, kala ong ba dei ban pynkylla iaka rukom pyrkhat bad shna iaki iing ne ophis sorkar khnang ba baroh ki briew, khamtam kiba duna dkhot met bad ki khynnah, kin lah ban rung ban mih bad ban iaid da ka jingshngain bad ka burom khlem da donkam iaka jingiarap ne jingsngewsynei na kiwei.
Kala kyrpad iaki heh sorkar ba kin tei iaki ophis sorkar ne ki iing sorkar da kaba pyn kynthup lang iaki lynti iaid na ka bynta jong ki briew ba duna dkhot met bad kin ioh iaid laitluid.
Kala ong ruh ba dei ban tei iaki lynti iaid kjat ruh ban ioh rung ioh mih kynthup iaki surok, ophis sorkar, jaka trei, jaka leit pynjhieh bad kiwei kiwei ki jaka ba la biang kiba pyndonkam man ka sngi.
U Commissioner bad Secretary jong ka tnad ba peit iaka bha ka miat ki paidbah, u Pravin Bakshi, IAS, u la ong ba ka jingdon ki lad ban ioh rung ioh mih da kaba suk ka dei lang bad ka ain bad u la khot ban pyniasoh iaka hapoh ki kyndon tei iing, ki jingbit ban shna iing, ki lad ki lynti ban tei bad ban pynneh iaki iing ki sem.
Ha kane ka prokram ba shi sngi, la iashim bynta lang da u Justice H.S. Thangkhiew, Justice B. Bhattacharjee bad Justice W. Diengdoh, ki Judges jong ka iing kashari baheh jong ka jylla Meghalaya, ryngkat kiwei pat ki heh sorkar na ka tnad treikam ka bha ka miat ki paidbah, tnad ki pulit bad kiwei kiwei ki tnad sorkar, nalor jing kine, la khot sngewbha lang iaki nongiashim bynta bad ki nongioh jingmyntoi.
