Shillong, Lber 05: Mynta ka sngi 05 Lber 2026 u myntri rangbah ka jylla u Conrad K.Sangma, u symbud myntri rangbah u bah Prestone Tynsong u ba dei peit ia ka tnad kam poh iing kila sam ia ka shithi thung kam sha ki 2968 ngut ki samla ha ka kam pulit ha ka jingialang kaba la long ha ka 2nd MLP Batallion Tura.
Ia kine ki 2968 ngut la kynthup lang ha ki shnat bapher bapher, kiba dei ha ka kynhun ban bat suloi ki long 1494 ngut kiba dei ha ka kynhun bym bat suloi ki long 720 ngut, ha ka kynhun phah jingtip 205 ngut bad ki pulit pynlit ding 195 ngut.
Haba kren ha kane ka jingialang u myntri rangbah ka jylla u la ong ba kane ka dei ka sien kaba nyngkong ha ka khana ka jylla ba la ai ia ka shithi thung kam ha ka shisien ai haduh 2968 ngut ki samla bad kane ka long ka burom bad ka jingsngewsarong ia ka sorkar.
U myntri rangbah u la pynkynmaw kiba la aplai ia kane ka kam pulit ki long 1,70,000 ngut hynrei kiba la shah jied ki long 2968 ngut, u myntri rangbah u pynkynmaw ia kine kiba la ioh ban rung ha ka kam pulit ba kin long kiba don ka jingkitkhlieh na ka bynta ka shongsuk shongsain bad u la ong haba ki phong ia ka uniphom ki dei ban don ia ka jingsngewsarong.
Kiwei kiba la kren ha jingsam ia ka shithi thung kam ki long u symbud myntri rangbah ka jylla u bah Prestone Tynsong, ka Director General ki pulit ka kong Idashisha Nongrang, kaba la kren pdiang burom ha kane ka jingialang. HA kane ka sngi la ia don lang kiwei ki heh pulit bad ki bahaiing ha sem ban ia sakhi lang ia kane ka sngi.
