Gangtok, Lber 09:Ka kynhun ki nongthoh khubor kaba kynthup ia 10 ngut ki dkhot na ka jylla Meghalaya ki la poi mynta ka sngi ha Gangtok kum shi bynta ka jingleit ki nongthoh khubor kaba hynriew sngi sha ka jylla Sikkim kaba la pynlong da ka Press Information Bureau (PIB) Shillong. Ia kane ka kynhun la pdiang sngewbha da ki ophisar jong ka PIB Gangtok ha ka por ba ki la poi.
Ia kane ka jingleit la pynlong kum shi bynta jong ki sienjam jong ka PIB Shillong ban pynkhlain ia ka jingiadei bad ki lad pathai khubor ha ka thain bad ban ai ia ki nongthoh khubor ia ka jingshemphang shaphang ki sienjam ba kongsan ba iadei bad ka roi ka par ha ki kam kum ka rep ka riang, horticulture, ka kam jngohkai pyrthei, ka jingwad bniah bad ka kam pynroi ha ki jaka khappud.
Ha kane ka jingleit, ka kynhun ki nongthoh khubor kin leit jngoh ïa ki katto katne ki jaka treikam bad ki jaka ba kongsan ha kylleng ka jylla bad kin ïakynduh bad ki heh ophisar bad kito kiba don bynta ha kane ka kam ban sngewthuh ïa ki sienjam kiba jop bad ki rukom treikam kiba bha tam.
Kane ka prokram ka kynthup ïa ka jingleit jngoh ïa ka Spices Board India Regional Office ha Gangtok, ha kaba ki nongthoh khubor kin ioh jingtip shaphang ki sienjam kiba ïadei bad ka jingrep kaba heh ia u cardamom, ka lad ban shalan mar shabar ri bad ki lad jingïarap ïa ki nongrep.
Ka kynhun kan leit jngoh ruh ia ka ICAR–National Research Centre for Orchid ban ioh jingtip shaphang ka jingwad bniah bad jingkyntiew ha ka kam thung syntiew, ka jingsumar ia ki syntiew orchid bad ka kamai kajih kaba pynshong nongrim ha ka rep ka riang.
Ki nongthoh khubor kin leit jngoh ruh ia ka Indian Orchid Festival 2026 ha Pakyong, kaba pyni ia ka jingbun ki jait syntiew orchid jong kane ka thain bad kaba kyntiew ia ka kam thung syntiew bad ka kam jngoh kai.
Kum shi bynta jong kane ka prokram, kane ka kynhun kan leit jngoh ruh ïa ka Vibrant Village ha Tingra ban sngewthuh ïa ki kam pynroi kiba la pyntreikam ha ki thaiñ khappud hapoh ka Vibrant Villages Programme.
Ka kynhun kan leit iakynduh ruh ïa u Lat ka jylla Sikkim bad ïa u Myntri Rangbah ka jylla Sikkim ban sngewthuh ïa ki kam ba kongsan jong ka jylla bad ki sienjam ba kongsan ba iadei bad ka roi ka par.
Ka jingleit jngoh kan kynthup ruh ïa ki jaka jngohkai kiba pawnam kiba iadei bad ka kolshor bad ka mariang kynthup ïa ka Rumtek Monastery, Ban Jhakri Falls and Energy Park, bad ka Tsomgo Lake, kaba pyni ïa ka riewspah jong ka kolshor bad ka kam jngohkai pyrthei jong ka Sikkim.
Kane ka kynhun kan leit jngoh ruh ia ka jaka ba kongsan ha ka thain khappud kum ka Nathu La Pass bad ka Baba Harbhajan Singh Mandir ban sngewthuh ia ka jingdonkam jong ki jingdon jingem ha ka thain khappud bad ka bynta jong ki shipai ha kane ka thain.
Ka press tour ka thmu ban iarap ia ki nongthoh khubor ban iohi ia ka jingpyntreikam ia ki skhim jong ka Sorkar India bad ki prokram ba iadei bad ka roi ka par ha ki jaka nongkyndong, ban iakren bad ki nongioh jingmyntoi bad ki nongshong shnong, bad ban lum ia ki khubor, ki dur bad ki jingshem ha ka jaka.
