Shillong, Lber 13: mynta ka sngi ki nongkyrshan ka NPP kila pynlong ia ka jingialang ha ka ophis jong ka party ha Tura kaba la shah thang ha kine ki sngi ba don ka jingklumar, ha kane ka jingialang la don u myntri rangbah ka jylla u Conrad K. Sangma u lamphang ka iing dorbar u Thomas A. Sangma, la don lang ki myntri sorkar ki MLA bad da ki spah ngut ki nongkyrshan party.
U national President u Conrad K. Sangma u ba dei ruh u myntri rangbah ka jylla Meghalaya haba kren ha ka jingialang u la ong ba ka party NPP kan sa pynbeit ia kane ka mat kaba ia dei bad ka syrnot Schedule Tribe bad la ong ba yn nym don mano mano ba lah ban pynrit mynsiem ia ka party NPP.
Ka Party NPP kan nang iai bteng ban ai ka jingshakri ia ki paidbah bad ba kin bud ia ka lynti kaba u Pyrno A. Sangma Bam Kwai ha Dwar u Blei u la hikai ba kum ki khristan ngi dei ban ia ieid bad ban ia map bad u la ong to ngin nang pynkhlain shuh shuh ia ka party da kaba u khot u wer ban iatylli kawei kum shipara.
Ha kane ka sngi u myntri rangbah ka jylla u la pynpaw ia ka jingsngewnguh ia ki pulit kiba la lah ban teh lakam ia ki jingklumar ha kajuh ka por u pynpaw ia ka jingsngewnguh ia ki paidbah nongshong shnong ka sor Tura kaba kila iasnoh kti lang baroh ban pynkhuid ia ki synrum bad ka jingkhublei ka leit sha baroh ki nongialam niam kiba la buh ka jingkyrpad ban wanrah ia ka jingshongsuk.
