Shillong, Iaiong 14: Ka MY Bharat Budget Quest 2026 – North Eastern Region, kaba la pynlong da ka Mera Yuva Bharat (MY Bharat) hapoh ka Tnad Youth Affairs and Sports, Sorkar India, ka la kut noh ha nongbah Shillong ha kaba ka la don ka jingïakren lyngba ka bor internet da u Myntri Sorkar Pdeng ba dei peit ia ka Tnad kam ialehkai, u Mansukh Mandaviya.
Ia kane ka prokram kaba ar sngi la pynlong ha U Soso Tham Auditorium ha ka 12 bad 13 tarik Iaiong, kum shi bynta jong ka sienjam ha ka ri baroh kawei kaba kynthup ia 17 tylli ki jaka ha kylleng ka ri, kynthup ia baroh phra tylli ki jylla ka thain shatei lammihngi.
Haba ai jingkren sha ki samla kiba la iashim bynta, u Myntri Sorkar Pdeng u la pynshlur ia ki ban iashim bynta shitrhem ha ka jingtei ia ka ri, ki jingiakren ia ki polisi bad ka roi ka par kaba la wanrah da ka jingsaindur thymmai. U la ban jur ia ka bynta ba kongsan jong ki samla kum ka bor ba kyntiew ia ka jingthmu jong ka Viksit Bharat @2047 bad u la kyntu ia ki ban nohsynniang ia ki jingmut bad ki lad ki lynti kiba iahap bad ki jingthmu ba kongsan jong ka Mang Tyngka jong ka sorkar pdeng.
U Myntri sorkar pdeng u la pynbna ruh ba ka ‘Viksit Bharat Young Leader Dialogue’ ka ban wan kan don ia ka rukom kaba thymmai kata ka ‘State Edition’, ka ban kynthup ia ki jingiakop kylli jingkylli ha ka kyrdan jong ka jylla ban ithuh ia ki sap ba tbit. Ki nongïashim bynta kiba la shah jied kin ïakren bad la ki jong ki jong ki Myntri Rangbah bad ki Lat bad na kine ki state edition yn khot 3000 ngut ki nongïashim bynta sha New Delhi ban wanrah beit beit ïa ki jingmut jong ki sha u Myntri Rangbahduh ka ri ha ka National Youth Day.
Ia kane ka prokram la plie ruh da u Bah Wailadmiki Shylla, Myntri ka tnad kam ïalehkai jong ka Sorkar Meghalaya, uba la ai mynsiem ïa ki samla ban shim kabu pura ïa ki rynsan kum ka Budget Quest. U la ban jur ïa ka jingkut jingmut jong ka Sorkar Jylla ban kyntiew ïa ki samla, kynthup ïa ki jingmang pisa ba kyrpang na ka bynta ki sienjam kiba pynleit jingmut sha ki samla.
U la pule ia ka khubor na u Myntri Rangbahduh ka India, u Narendra Modi, da kaba ban jur ba ki jingiakren ki iarap ban plie ia ki jingmut kiba bun jait bad pyndonkam ia ka jingstad jong ki samla ban tei ia ka ri kaba kham khlain bad kaba peit shakhmat. Ha ka jingai jingkren jong u, u Bah Shylla u la batai bniah ruh halor ka prokram jong ka Sorkar Jylla halor ka jingiadei hapdeng ki samla pule, kaba la pynlong ha ki kyrdan bapher bapher naduh ki block bad distrik haduh ki rynsan jong ka ri bad kylleng ka pyrthei bad u la pyntip ba yn phah shabar ri ia artylli ki kynhun jong ki samla pule mynta u snem, kawei sha Malaysia ha u bnai Jylliew bad kawei pat sha Philippines, ban ïoh ïa ka jingsngewthuh ia ki kolshor bapher bapher.
Ka prokram ka la pynïasoh lang ïa ki samla kiba la ioh lad lyngba ka jingïakob kaba jur bha ha ka ri baroh kawei. Palat 15,000 ngut ki samla na kylleng ki jylla bad ki Union Territory ki la ïashim bynta ha ki jingïamir jingmut ha kylleng ka ri, da kaba ïashim bynta bad ki phang kiba ïahap bad ka Mang Tyngka 2026 jong ka sorkar pdeng. Ka sienjam ka la pyni ïa ka Amrit Peedhi, kaba pynkupbor ïa ki samla ban nohsynñiang shitrhem sha ka jingïakren ia ki polisi jong ka ri bad ka jingtei ia ka ri.
Ha ka sngi ba nyngkong la plie paidbah ïa kane ka prokram da u Kongsan Bah Mariahom Kharkhang; ophisar IPS ba la shongthait bad u nongtrei mon sngewbha na ka bynta ka imlang sahlang. Kiwei pat ki kynrem ki lyndan kiba la don ha katei ka sngi ki kynthup ia u Dinobondhu Saha, Regional Director, MY Bharat (North Eastern Region); u Bimal Patrick Shah, Joint Director; u Mehbub Alam Laskar, Joint Director; u Ataur Rahman, Joint Director; bad u Bah Bobby Wahlang, State Youth Officer ,Tnad Kam Ialehkai, Sorkar Meghalaya.
Haba ai jingkren ha ka jingialang plie, u Kongsan u la ban jur ïa ka jingthmu jong ka Viksit Bharat @2047 bad kyntu ïa ki samla ban noh synñiang da kaba don jingmut sha ka roi ka par jong ka ri. U la ban jur ia ka jingiatylli ha ka jingiar, ka jingdonkam ban ialeh pyrshah ia ki jingeh ha ka imlang sahlang kum ka jingdih drok, bad u la ban jur ia ka jingdonkam jong ka Nari Shakti ha ka jingtei ia ka ri.
La sdang ia ka prokram da ka jingialang pynkup burom bad pynmeh ia ka sharak, bud sa ka jingrwai ia ka Vande Mataram. La pynlong ruh ïa ka “Sundays on Cycle” ryngkat ka jingïatreilang bad ka Sports Authority of India, ha kaba la sakhi ïa ka jingïashim bynta kaba shitrhem. Ha kajuh ka por, la pynlong ïa ka Women’s Youth Parliament hapoh ka phang pdeng “Nari Shakti: Viksit Bharat Ki Awaaz”, ha kaba ki nongïashim bynta ki la ïashim bynta ha ka jingïakren shaphang ka Women’s Reservation Bill bad la pdiang ïa ka rai kaba pynpaw ïa ki jingsngew ba ïatylli jong ki.
Ha ka sngi kaba ar, la pynlong ia ki jingialang ba iadei bad ki phang bad ki jingiakren halor ki mat ba kongsan jong ka polisi. Ha ka panel halor ka “Green Viksit Bharat – Environment-Friendly and Sustainable Development” la ïashim bynta da ki riew shemphang kiba kynthup ïa u Albert Chiang,OSD Meghalaya Basin Development Authority (MBDA), Bah Wanshan Kharkrang,Joint Secretary, Forest and Environment, u Akhilesh Singh, CEO Earthtree, bad u Naba Bhattacharjee; Commissioner barim ka National Green Tribunal, kiba la iamir jingmut halor ka roi ka par kaba iaineh, ka jingpynneh pynsah ia ka mariang bad ka bynta jong ki samla ban tei ia ka ri India kaba kham khuid.
Kawei pat ka panel halor ka “Human Capital – Investment in Education, Skill Development and Employment” la kynthup ïa u Bah Michael Makri, Director, Don Bosco Youth Center, Kong Audrey Khonglam, District Skill Development officer bad u Dr. Benjamin Langdoh, Professor, North Eastern Hill University, kiba la ban jur ia ka jingdonkam ban pynkhlain ia ki rukom ai jinghikai, ban kyntiew ïa ka jingtbit bad ban pynmih ïa ki lad ioh kam ban shim ia ki lad kiba mih na ka jingbun briew jong ka India.
Ka MY Bharat Budget Quest 2026 ha nongbah Shillong ka la kut noh ha ka jingshitrhem, kaba la lah ban kyntiew ia ka jingiakren kaba don jingmut bad ai bor ia ki samla ban iashim bynta shitrhem ha kaba pynwandur ia ka lawei jong ka ri.
