Shillong, Iaiong 14: Ka jingap khmih lynti ïa katta ka sngi ka ïa, ka jingsdang ka lympung bah ïalehkai phutbol ba heh tam ha ka jylla ka 5th Meghalaya State League (MSL 5), kan sdang naduh lashai ka sngi Balang jong ka taiew da ka jingïakhun kaban long hapdeng ka Nongkseh SSCC bad ka Khimusniang SC, kane ka jingïakhun kan sdang ha ka por 5 baje janmiet, ha SSA Stadium, ha kaba ki paidbah ki lah ban ïoh ïa ki tiket ki jong ki na ki jaka die ba don ha kane ka madan.Kane ka jingïakhun kan dei naka bynta ka Group A, ïa kaba yn wan ban plie ïa ka da u myntri ba dei khmih ïa ka tnat Sports and Youth Affairs, u bah Wailadmiki Shylla.
Kum ka kynhun, ïa mynta hi ka Nongkseh SSCC ka dei kawei na ki klob kaba la sdang bha ba kan pynkren briew, hadien ka jinglah ban ïalehkai bha ka jong ka myn ha ka samoi ïalehkai u snem ba la dep u 2025, da kaba sdang shwa da ka jinglah ban rah ïa ka nam kum ka lahduh jong ka First Division, hadien kane ban rah pat sa ïa ka Champions Cup, kiba dei ki lympung ïalehkai ka Shillong Sports Association bad khlem da klet ba kum ka kynhun ka la bteng ba kan ïoh ban rah ruh ïa ka nam lahduh jong ka Sikkim Gold Cup kaba la long ha u bnai Kyllalyngkot mynta ka snem.
Katba na ka liang ka Khimusniang, kan pyrshang ba kan ïoh ïa ka jingsdang ba paka ka jong ka hadien ba ka la rah ïa ka nam lahduh Kiang Nangbah Memorial Trophy kaba dei ka lympung ïalehkai ka Super Division ka West Jaiñtia District Sports Association, bad ba kan pyrshang lem ban bud ïa ki dienjat ka Niaw Wasa United, kaba dei ka klob ïalehkai ba nyngkong ha ka jylla ban rah ïa ka nam lahduh ba sdang jong ka MSL ha ka samoi ïalehkai 2017-2018.
Kum ki klob ka Nongkseh bad ka Khimusniang, kin ïoh ba kin ïuh kjat nyngkong ha kane ka lympung ïalehkai ka MSL ïa kaba la ïarap ban kyrshan pura ïa ka da ka tnat Directorate of Sports and Youth Affairs, ka sorkar jylla.
Ha ki saw samoi ïalehkai jong kane ka lympung, ki klob ïalehkai ba la ïoh ban rah ïa ki nam lahduh ki ïapher man la ka samoi ïalehkai, Niaw Wasa United (2017-18) , Shillong Lajong (2019), Rangdajied United (2023) bad Mawlai (2024-25).
Kumta mynta hi ruh ka kynti, yn ïa khmih mano napdeng kita ki klob ne ki kynhun ïalehkai ka jylla kiban ïoh ban rah ïa ka nam lahduh.
