Shillong, Iaiong 16: Mynta ka sngi 16/Iaiong/2026 ka Seng Khihlang ha ka jingialam u symbud myntri rangbah ka jylla u bah Sniawbhalang Dhar kila ia kynduh ia u myntri rangbah ka jylla u Conrad K. Sangma bad ha kane ka jingiakynduh kila ia kren ia ka jingdonkam ka seng.
Ha kane ka jingiakynduh u myntri rangbah u la ong ba un ai pisa san phew lak tyngka na ka skhim Chief Minister Special Development Fund na ka bynta ba kin shna ia ka ophis trei kam jong ka seng khnang ba ki kam ki jam kiba ka seng ka trei kin long ha ka rukom kaba bit ba biang.
U myntri rangbah u sngewthuh shai ba ka Seng Khihlang ka dei ka seng kaba ialeh ban pynneh pynsah ia ki riti ki dustur kiba la ioh pateng na u longshuwa bad ha kajuh ka por ka dei ruh ka seng kaba ialeh ban kyntiew bad ban iada ia ka Niam Tynrai ki jait bynriew Khasi Pnar.
