Shillong, Iaiong 16: Ka Awaken India Movement (AIM), Meghalaya State Chapter ka la pynpaw ba ym don aiñ ban kyntait ia kino kino ki scheme sorkar lane ka ration tang namar bym don Aadhaar. Ka AIM Meghalaya ka kyntu jur ia ki paidbah ban tip bad iada ia la ka hok lajong bad ka la pynpaw ruh ia ka jingshisha kaba la mih lyngba ka jubab kaba la ioh pdiang katkum ka RTI (Right to Information) lyngba ka ophis jong u Deputy Commissioner (Supply), East Jaintia Hills District. Kane ka jubab kalong kaba la pynshai ba ym don kano kano ka aiñ lane ka hukum sorkar ban kyntait ration ia ki paidbah ba duk tang na ka daw jong ka Aadhaar.
Katkum ka jubab lyngba ka RTI jong u Deputy Commissioner la pynpaw shai ba ym don uwei ruh u nongbat ration card hapoh East Jaintia Hills uba la shah kyntait ban ioh ration namar bym don Aadhaar lane bym pat pyniasoh Aadhaar.
Ka jubab ka la kdew shai ruh ba watla ka pynshlur ia ki Fair Price Shop lane ki Gas Agency halor ka e-KYC, hynrei ym don kano kano ka hukum kaba ailad ia ki ba kinlong ki bor ba dei khmih ban pynsangeh noh ia kino kino ki jingmyntoi jongki paidbah ne wat haduh ban rai pynduh ration lada ki paidbah kim pat pdiang Aadhaar.
Ka AIM Meghalaya ka la ong ba kane ka pynshisha ba ka Aadhaar kam dei ka jingdonkam kaba kongsan (mandatory) ban ioh ia ki jingmyntoi ba dei lyngba ka Sorkar lane kynthup haduh ka ration hapoh ka Public Distribution System (PDS), bad kino kino ki jingkyntait ration halor kane ka nongrim kin long kiba pyrshah ia ka aiñ bad ka hok jong ki paidbah khamtam lada phai halor ka jingshah pynkheiñ noh ka Riti Synshar
Paidbah jongka Ri India (Indian Constitution) katkum ka, Article 14 – Right to Equality: Ka jingpynkheiñ ia ka jingiaryngkat lada don jingpyniapher hapdeng kiba don Aadhaar bad kiba ym don. Article 21 – Right to Life: Ka hok ban im kaba kynthup ia ka hok ban ioh bam; lada kyntait ration ka lah ban ktah ia ka jingim briew.
Article 19(1)(d) & 19(1)(g): Ka jingpyndik ia ka jingiaid laitluid bad ka kamai kajih lada paidbah ki shah ktah ha ki rukom pyntreikam. Article 38 & 39 (Directive Principles): Ka jylla ka dei ban pynneh ia ka jingbit jingbiang bad jingiaryngkat ha ka imlang sahlang, ym ban pynjynjar ia ki paidbah khamtam ia kiba duk.
Ka AIM Meghalaya ka la pynpaw ruh ia ka jingsngewkhia halor ka jingbymshai ha kaba iadei bad ki kot ki sla (alternative identity documents) kiba lah ban pyndonkam da kito kiba ym don Aadhaar, namar kane ka bynta la aiti sha ka Directorate of Food, Civil Supplies & Consumer Affairs, Meghalaya, Shillong.
Ha ka jingkhot paidbah, ka AIM Meghalaya ka kyntu ia baroh ki Fair Price Shop dealers bad ki ophisar ba kin bud ryntih ia ka nongrim ba ym dei ban kyntait ration ia kino kino ki nongioh jingmyntoi tang na ka daw jong Aadhaar.
Ka la kyntu ruh ia ka Directorate ba kan pynmih ia ki kyndon ba shai bad ba thoh paidbah ban pynduna ia ka jingkulmar ha ki shnong ki thaw bapher bapher.
Ka seng ka la kyntu ia ki paidbah ba kin long kiba husiar bad kiba tip ia la ki hok, bad ban mih shakhmat ban ujor lada don kano kano ka jingkyntait ne jingbym biang ha ka rukom sam ration.
Ka AIM Meghalaya ka la pynkut da kaba ong ba ka jingioh bam hapoh ka PDS ka dei ka hok bad ka burom jong ki paidbah, bad ym dei ban shah ktah da kino kino ki jingeh administrative ne technical.
Ka seng ka la pynpaw ruh ba kan dang bteng ban buddien ia kane ka kam ha ryngkatlang bad ki paidbah ban iada ia ka hok kum ki nongshong ba pura hapoh jylla ym ba kinlong tang kum ki briew kiba wan shongwai shipor lane kiban shah ialam bakla lyngba ki Politician kiba shu wan ban pynbieit.
