Shillong, Iaiong 25: Hadien ka jingkut noh ka samoi treikam jong ka Jinglong Rangbah Shnong u Bah EK Lapang u ba la bam kwai ha Dwar U Blei, mynta ka sngi naka liang ka Dorbar Shnong Saiden ha Ri Bhoi District kala ioh ban pynskhem iaki nongktkam kiba thymmai hapoh ka Shnong Saiden hakaba ki paidbah kila jied ia u Bah EJ Myrthong kum u Rangbah Shnong bad ia u Bah S Kharlukhi kum u Secretary Shnong ryngkat bad ki Executive Members jong ka Shnong ki Rangbah Dong naka 7tylli ki dong kiba don hapoh ka Shnong Saiden.
Kumban shu kdew khyndiat ba iaka jingjied Rangbah Shnong jong ka Shnong Saiden kala long haka 25tarik bnai Lber 2026 hakaba ia shim bynta shitrhem daki paidbah nong shong Shnong jong ka Saiden hi baroh kawei.
Kum ka jing pynkupbor ia u Rangbah Shnong bad u Secretary Shnong jong ka Shnong Saiden la wan ban ai synrnot da u Bah Luistar Lynngdoh u ba dei u Acting Sirdar ka Nongpoh Elaka bad u la pynspong ruh daka jain tynrai ryngkat bad u Paila kum ka dak jong ka jing pynkupbor iaki nongialam shnong jong ka Shnong Saiden bad ka jing pynbam smai kum u nongialam shnong jong ka shnong Saiden hakaba la ia don lang da ki longsan ki mansan naki wei ki raid ryngkat ki Rangbah ki longkmie ki samla jong ka Shnong Saiden baroh kawei.
Haba ai jingkren naka liang u bah Luistar Lynngdoh u la ong haba jied iaki rangbah shnong ki dei ban pyntip sha ka Elaka khnang ba ki nongialam jong Elaka kin long ki nongpeit ki nongkhmih lane ki Observer haka por ba jied iaki nongialam shnong, bad u la ong ruh ba kum ka Elaka bad ka Dorbar Shnong ka donkam ka jingiatreilang haki Lai tylli ki mawbyrsiew kiba kynthup iaka Dorbar Shnong ka Dorbar Raid bad ka Dorbar jong ka Elaka khnang ban wan rah iaka jing iatylli ka jingia sngewthuh jingmut bad ka jingiaieid. Bad shuh shuh u la bynrap ruh dakaba ong ba naduh mynta ka sngi lada ki paidbah ki don kano kano ka jing bym ia sngewthuh jingmut hapoh shnong poh thaw kidei ban ia kynduh ia u Rangbah shnong khnang ban lait na kino ki jingiapher jingmut bad kum ki paidbah nong shnong kim dei ban iaid lait na u Rangbah Shnong lane naki nongialam shnong khnang ban don ka jingiatylli hapoh ka imlang ka sahlang.
Haba ai jingkren naka liang u Rangbah shnong ka shnong Saiden u la ong ba lada ki nong shnong jong ka shnong Saiden hi baroh kawei lada ki dei kiba vote ia u ne lane bad ki bym vote ia u ruh hynrei un trei iabaroh lang khlem ka jingleh shilliang lane ka jingpeit khmat shilliang iano iano ruh bad u la kular ruh ba un kitkhia iaka kam shnong daka jingtip briew tip Blei bad ban pyndep hok iaka kam kum ba la bynshet ha u.
