Shillong, Iaiong 27: Ki pulit jong ka North Garo Hills District kila ioh ban pynlait ia u nongkhaii na kti ki nongrah bor na Mansinggre bad kila ioh kem 3 ngut ki briew kiba suba don kti ha kane ka kam rah bor, ki pulit kila ioh ruh ban bat ia ka kali tourist kaba pyndon kam ha kane ka kam sniew kaba don ia u number ML08-K-5869.
Ki pulit jong ka North Garo Hills District kila ioh ia ka jingpyntip ha ka por 3.00 baje jan miet ba ki don ki briew kiba la rah bor ia u wei u nongkhaii ha ka kali tourist kaba don ia u ML08-K-5869 na Bolsong bad mar ia ioh ia ka jingpyntip kila pynlong ia ka jingap ktem da ki pulit jong ka Bajengdoba.
Ha kane ka jingpynap ktem ki pulit kila ioh ban bat ia kane ka kali ha ka por 3.30 baje na Mansinggre, ki pulit kila ioh ban bat bad la lap ba hapoh kane ka kali u don u briew bala shah rah bor bad ki pulit kila ioh ban kem ia ki lai ngut ki briew kiba don hapoh ka kali.
Ha ka jingtohkit kila iathuh ba kila lap ia u ne u nongkhaii ha Bolsong bad kila knieh ia u shabi jong ka bike bad ia ka mabile bad kila ioh ban shim ia ka pisa T.30,000/- tyngka bad u wei pat u la niah ia ka bike bad bud ia ki na dien.
Ki lai ngut kiba la shah kem la tip kyrteng kum u Tenggra Ch Marak 36 snem, u Dipon D Sangma 38 snem bad u Lovingson R Marak bad u Tenggra Ch Marak u la kam ha khmat ki pulit ba don jingiadei bad ka seng Untied Garo Peoples Forum.
Ia kane mutkotduma la register hapoh jong ka Bajengdoba Police Station, na ka liang jong ki pulit kila kyntu ia ki paidbah ba kin long kiba peitngor bad haba don ki kam sniew pyntip sha ki thanad kaba jan eh ne sha ka number jong ki pulit.
