Shillong, Jymmang 01: Ka NTPC Limited ka la ïasoi ïa ka Memorandum of Agreement (MoA) bad ki bor pynïaid District jong ka Ri-Bhoi, Meghalaya, na ka bynta ban seng ïa ki STEM (Science, Technology, Engineering and Mathematics) Laboratory ha ki 27 tylli ki Skul Sorkar ha kylleng ka District hapoh ka sienjam CSR jong ka thain shatei lammihngi jong ka ri.
Ia kane ka jingiateh la pynskhem mynta ka sngi, kaba long ka sienjam kaba kongsan ban pynkhlain ia ki jingdon jingem ba iadei bad ka pule puthi bad ban kyntiew ia ka jingpule lyngba ka jingpyrshang ha ka thain.
Ha ka ka jingiasoi ia ka MoA la don lang u Abhilash Baranwal, Deputy Commissioner ka Ri-Bhoi District, Meghalaya bad u Amit Kr. Asthana, u heh jong ka HR, NTPC Bongaigaon Assam. Ha kane ka jingialang iasoi ia ka MOA la wan ïashim bynta da u Sailand G Momin, Research Associate, Planning Branch, Ri-Bhoi District, u Madhurjya Singha Lahkar, DGM (HR-Corporate Communication) bad ka Smriti Das, Executive ( CSR, LA and R&R), NTPC Bongaigaon, Assam mynta ka sngi ha ka ha ka ophis jong ki bor pynïaid District ha Ri-Bhoi District, Meghalaya.
Hapoh kane ka sienjam, ka NTPC kan ai jingkyrshan pisa haduh T.1.48 klur na ka bynta ban plie ïa ki STEM laboratory kiba la pynkhreh pura ha 27 tylli ki skul sorkar, kaba thmu ban kyntiew ïa ka rukom pyrkhat kaba don nongrim ha ka saian, ka jingsaindur, bad ka jingtbit ban pynbeit ïa ki jingeh hapdeng ki khynnah skul.
Ka projek kan kynthup ia ka jingkyntiew ia ki jingdon jingem, ka jingthied ia ki tiar STEM kiba katkum ka juk mynta, ka jingai jinghikai ia ki nonghikai, bad ka jingkyrshan ban peit ia ka jingpyniaid ia ka kam.
Ki bor pyniaid District jong kaRi-Bhoi, kin trei kum ka jaka pyntreikam bad kan kitkhlieh ban pyntreikam, ban thied, ban pynthikna ia ka jingbha, bad ban iatreilang bad ki skul kiba ioh jingmyntoi.
Ka NTPC, kum ka tnat kaba bei tyngka, kan buddien ia ka jingiaid shaphrang lyngba ki jingpeit bniah man ka por, ki jingleit jurip ia ka jaka, bad ki jingpeit bniah ia ka jingktah ban pynthikna ia ka jingpyntreikam kaba paka ia ka projek.
Yn plie ia ki STEM laboratory hapoh ki jingdon jingem ba la don lypa ha ki skul bad kin kynthup ia ki tiar ai jinghikai kiba kham katkum ka juk mynta kum ki tiar robotic, ki kam kiba iadei bad ka bording kaba lah ban pynthymmai, ki tiar elektronik, bad ki tiar digital kiba ai jingiarap.
Ka sienjam ka kynthup ruh ia ki prokram ai jinghikai ia ki nonghikai ba la buh ryntih bad ka jingpeit bniah naduh ba sdang haduh ba kut ban thew ia ki jingmih na ka jingpule bad ka jingktah baroh kawei.
Kane ka sienjam ka pyni ia ka jingiaibteng jong ka NTPC ban kyntiew ia ka imlang sahlang lyngba ki sienjam Corporate Social Responsibility (CSR) jong ka, da kaba pynleit jingmut ha ka pule puthi, ka jingkyntiew ia ki sap, bad ka jingkyntiew ia ka bor treikam.
La khmih lynti ba kane ka projek kan ai jingmyntoi ïa bun ki samla pule ha kylleng ka Ri-Bhoi District da kaba ai ki lad ki lynti ban iohi dalade ia ki kam kiba don nongrim ha ka kam saian bad ban kyntiew ïa ka jingsaindur thymmai ha ki jaka nongkyndong.
Ka jingiatreilang ka iahap ruh bad ki jingthmu ba kongsan jong ka ri ban kyntiew ia ka jingpule STEM bad ban tei ia ki sap kiba la pynkhreh na ka bynta ka lawei, khamtam ha ki thain kiba duna ka jingshakri.
Lyngba kane ka jingiatreilang, ka NTPC bad ki bor pyniaid District ki thmu ban wanrah ia ka jinglong jingman kaba iaineh na ka bynta ka jingpule kaba bha bad ban pynkupbor ia ki samla pule da ki sap kiba donkam na ka bynta ka jingkylla ha ka teknoloji.
